राष्ट्रियसभा निर्वाचन: कर्णालीमा दुई सिटका लागि चार जनाको प्रतिस्पर्धा

सुर्खेत। आज भइरहेको राष्ट्रियसभा सदस्य निर्वाचनमा कर्णालीबाट दुई सिटका लागि चार जनाले प्रतिस्पर्धा गरिरहनुभएको छ । 

बिहान ९ः०० देखि दिउँसो ३ः०० बजेसम्म तय भएको मतदान कार्यक्रम अन्तर्गत यो समाचार तयार पारुन्जेल ८५ प्रतिशत मत खसिसकेको सुर्खेत जिल्ला न्यायाधीस तथा निर्वाचन अधिकृत दीपक ढकालले जानकारी दिनु भयो । कर्णाली प्रदेशमा एक महिला र एक अन्य गरी दुई सिटका लागि भइरहेको निर्वाचनमा तीन दलबाट ४ जना प्रतिस्पर्धामा हुनुहुन्छ । महिला क्लस्टरतर्फ नेकपा एमालेबाट मीनासिंह रखाल र नेपाली कम्युनिस्ट पार्टी (नेकपा) का अन्जु महतरा चुनावी प्रतिस्पर्धामा हुनुहुन्छ । त्यस्तै अन्य क्लष्टरतर्फ नेपाली काँग्रेसबाट ललितजंग शाही र नेपाली कम्युनिस्ट पार्टी (नेकपा) बाट बुद्धिप्रसाद शर्मा प्रतिस्पर्धामा हुनुहुन्छ ।

कर्णालीमा नेपाली काँग्रेस र नेकपा (एमाले) ले साझा उम्मेदवार उठाएका छन् । एमालेबाट महिलातर्फ मीनासिंह रखालको उम्मेदवारी परेको छ भने अन्यतर्फ नेपाली कांग्रेसका ललितजंग शाहीको उम्मेदवारी परेको छ । ४० सदस्यीय प्रदेशसभा र ७९ वटा स्थानीय तह रहेको कर्णाली प्रदेशको मतभारअनुसार नेपाली काँग्रेस र नेकपा एमालेको गठबन्धन बलियो देखिन्छ ।

राष्ट्रियसभाका लागि कर्णालीमा प्रदेशसभाका ४० र  ७९ वटा स्थानीय पालिकाका प्रमुख/उपप्रमुख– १५८ गरी कुल १ सय ९८ जना मतदाता हुनुहुन्छ भने ५ हजार १ सय २२ मतभार रहेको छ । प्रदेशसभा सदस्यको मतभार ५३ र स्थानीय तहका प्रमुख/उपप्रमुखको मतभार १९ रहेको छ ।