वीरगञ्जमा फैलिएको झाडापखाला र हैजा सङ्क्रमण नियन्त्रणमा

वीरगञ्ज । वीरगञ्ज महानगरपालिकामा फैलिएको झाडापखाला र हैजा सङ्क्रमण क्रमशः नियन्त्रणमा आएको छ । 

झाडापखाला नियन्त्रणमा आएसँगै दुई सातादेखि बन्द रहेका बीरगन्जका शैक्षिक सस्थाहरु समेत आजबाट सञ्चालनमा आएका छन् ।

पछिल्ला दिनहरूको तथ्याङ्कअनुसार अस्पताल भर्ना हुने बिरामीको सङ्ख्या अति न्युन रहेको छ भने उपचारपछि स्वास्थ्य भएर घर फर्किनेहरूको सङ्ख्या बढेको छ ।

वीरगञ्ज महानगरपालिकाको स्वास्थ्य शाखाका अनुसार पछिल्लो २४ घण्टामा केवल २ जनामा हैजाको सङ्क्रमण पुष्टि भएको छ भने झाडापखालाका कारण १२ जना विभिन्न अस्पतालमा भर्ना भएका छन् ।

यसअघि, मङ्गलवार २४ घण्टामा केवल ५ जनामा हैजाको सङ्क्रमण पुष्टि भएको थियो भने झाडापखालाका कारण ३७ जना विभिन्न अस्पतालमा भर्ना भएका थिए ।

त्यसैगरी, सोमबार ३ जनामा हैजा र ४४ जनामा झाडापखाला देखिएको थियो । आइतबारको तथ्याङ्कमा १५ जनामा हैजा र ८८ जना झाडापखालाका बिरामी भर्ना भएका थिए । तथ्याङ्कले सङ्क्रमण नियन्त्रणतर्फ अघि बढेको सङ्केत गरेको छ । 

नारायणी अस्पतालका चिकित्सक डा.उदयनारायण सिंहका अनुसार गत १२ दिनअघि हैजा पुष्टि भएयता सङ्क्रमणको दर ६० प्रतिशतले घटेको छ । हाल नारायणी अस्पतालमा १६ जना बिरामी उपचाररत छन्, जसमध्ये २ जना मात्र आइसियुमा छन् ।

नारायणी अस्पतालमा झाडापखाला र हैजाका लागि छुट्टै उपचार व्यवस्था गरिएको छ भने अन्य नियमित स्वास्थ्य सेवाहरू पनि निर्बाध सञ्चालनमा रहेको डा.सिंहले जानकारी दिनुभयो । “अबको केही दिनमा हैजा सङ्क्रमण शून्य हुने अपेक्षा छ,” डा.सिंहले भन्नुभयो, “रोकथाममा जनचेतना र सावधानी अपनाउनु सबैभन्दा प्रभावकारी उपाय हो ।”

बुधवारसम्म विभिन्न अस्पतालबाट ८६४ जना स्वास्थ्य भएर घर फर्किएका छन्  । स्वास्थ्य शाखाका प्रमुख राजु साहले सङ्क्रमणको सङ्ख्या घट्नु सुखद भएको बताउनुभयो । “गत भदौ ६ गते शुक्रवारदेखि सुरु भएको सङ्क्रमणले सुरुमा महामारीको रूप लिए पनि अहिले नियन्त्रणमा आएको छ”, उहाँले भन्नुभयो । हालसम्म १८२ जनामा हैजा पुष्टि भएकोमा १७५ जना निको भएर फर्किएका छन् भने ६ जनाको उपचार चलिरहेको छ ।

चिकित्सकहरूले सङ्क्रमण नियन्त्रणमा आए पनि व्यक्तिगत सरसफाइ, उमालेको पानीको प्रयोग र हात धुने बानी अपनाउन सुझाएका छन् । नारायणी अस्पतालका डा. नीरज सिंहले हैजा हावाबाट नफैलिने र सरसफाइमा ध्यान दिए पूर्ण रूपमा जोगिन सकिने बताउनुभयो । सङ्क्रमण नियन्त्रणका लागि महानगरले सङ्घ र प्रदेश सरकारसँग समन्वय गरी स्वास्थ्यकर्मी परिचालन, जनचेतना अभियान, खानेपानीको क्लोरिनेसन र ट्याङ्की सरसफाइलाई तीव्रता दिएको छ । पानीपुरी, चाटजस्ता स्ट्रिट फुडमा प्रतिबन्ध लगाइएको छ ।

स्वास्थ्य विशेषज्ञहरूले दीर्घकालीन नियन्त्रणका लागि स्वच्छता र पूर्वाधार सुधार आवश्यक रहेको औँल्याएका छन् । महानगरले स्थानीयवासीलाई स्वास्थ्य सतर्कता अपनाउन र सङ्क्रमण पूर्ण नियन्त्रणका लागि सहभागिता बढाउन अपिल गरेको छ ।