महाकाली आयुर्वेद औषधालय उपचार गराउनेको सङ्ख्या बढ्दै 

कञ्चनपुर । महाकाली आयुर्वेद औषधालय महेन्द्रनगरमा उपचार गर्न आउने बिरामीको सङ्ख्या दिनप्रतिदिन बढ्दै गइरहेको छ ।

सुदूरपश्चिम प्रदेश सरकार सामाजिक विकास मन्त्रालय अन्तर्गत सञ्चालित औषधालयमा दैनिक ४० देखि ६० जनाले उपचार सेवा लिइरहेका महाकाली  आयुर्वेद औषधालय कञ्चनपुरका कार्यालय प्रमुख डा.सूर्य प्रसाद उपाध्यायले जानकारी दिनुभयो । 

महाकाली आयुर्वेद औषधालयमा चालु आवको माघ मसान्तसम्म मात्रै ७ हजारभन्दा बढिले उपचार गरेको तथ्याङ्क छ ।

कुनै समयमा आयुर्वेदबाट स्वास्थ्य सेवा लिन बिरामीहरू न आउने गरेकोमा अहिले सेवा समेत विस्तार भएपछि प्रयोगशाला सेवा, पञ्चकर्म, पूर्व कर्म, योग सेवा, बाथ, स्त्रीरोग सेवा, सुगर, प्रेसर, बाबासिर लगायतका सेवाहरू प्रदान भइरहेको कार्यालयले जनाएको छ । 

डा.उपाध्यायले कतिपय बिरामीहरूले विभिन्न अस्पतालमा गएर उपचार गराउँदा समेत निको नभएपछि हामी कहाँ आएर उपचार गर्दा निको भएको बताउनुभयो । 

कार्यालयमा अहिले आवश्यकताअनुसार जनशक्ति, भौतिक संरचना अपुग भएकोले समय जनशक्ति र पूर्वाधारमा ध्यान दिन सके आयुर्वेदिक उपचार लिन सेवाग्राहीलाई सहजता हुने उहाँको भनाइ छ ।