सभापति देउवाद्वारा बस्नेतको निधनप्रति दुःख व्यक्त

काठमाडौँ । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले प्रजातन्त्र सेनानी देवीध्वज बस्नेतको निधनप्रति दुःख  व्यक्त गर्नुभएको छ ।

सभापति देउवाको तर्फबाट कांग्रेस केन्द्रीय कार्यालयका मुख्यसचिव कृष्णप्रसाद पौडेलले आज शोक विज्ञप्ति जारी गर्दै गत पुस २४ गते ९८ वर्षको उमेरमा निधन हुनुभएका बस्नेतको निधनप्रति दुःख व्यक्त गर्नुभएको हो ।

सोलुखुम्बुको चौलाखर्क लिखुखोलामा जन्मनुभएका बस्नेतले २००७ सालको क्रान्तिमा सक्रिय सहभागिता जनाउनुभएको थियो । उहाँले मुक्ति सेनामा रहेर प्रजातन्त्र प्राप्तिको सङ्घर्षमा नेतृत्वदायी भूमिका निर्वाह गर्नुभएको थियो ।

विस २०१५ को आम निर्वाचन पश्चात् पार्टी निकट बुद्धिजीवी परिषद्को राष्ट्रिय सम्मेलन हुँदा पूर्व ३ नं बाट प्रतिनिधि चुनिएर केन्द्रीय बुद्धिजीवी परिषद्को सदस्यमा बस्नेत निर्वाचित हुनुभएको थियो ।

बस्नेत नेपाली कांग्रेसको इतिहासका लेखक, संविधानसभा सदस्य एवं पूर्व आमन्त्रित केन्द्रीय सदस्य स्वर्गीय पुरुषोत्तम बस्नेतको दाजु तथा केन्द्रीय सदस्य एवं पूर्वमन्त्री अम्बिका बस्नेतको काका हुनुहुन्छ । स्वर्गीय बस्नेतका एक छोरा केशवध्वज बस्नेत तथा दुई छोरी अनारदेवी बस्नेत र अङ्गुर बस्नेत हुनुहुन्छ । उहाँको निधनबाट नेपाली काँग्रेसले प्रजातान्त्रिक आन्दोलनका योद्धा, एक अग्रज र अनुभवी व्यक्तित्वलाई गुमाएको कांग्रेस केन्द्रीय कार्यालयले जनाएको छ ।

सभापति देउवाले बस्नेतको निधनप्रति भावपूर्ण श्रद्धाञ्जली अर्पण गर्दै उहाँको आत्माको चीर शान्तिको कामनाका साथै शोक सन्तप्त परिवारजनप्रति पार्टी र आफ्नो तर्फबाट समवेदना प्रकट गर्नुभएको छ । रासस