भरतपुरका पाँच वटा वडा बालमैत्री

चितवन । भरतपुर महानगरपालिका पाँच वडालाई वालमैत्री वडा घोषणा गरिएको छ । महानगर प्रमुख रेनु दाहालले आज वडा नम्बर ६ लाई बालमैत्री वडा घोषणा गरेसँगै यो सङ्ख्या पाँच पुगेको हो । 

भरतपुर महानगरपालिकाका वडा नम्बर १४, २१, २३ र १३ लाई यस अघिनै बालमैत्री वडा घोषणा गरिएको थियो । विसं २०७६ असार २५ गते भरतपुर महानगरपालिका वडा नम्बर १४ लाई पहिलोपटक बालमैत्री वडा घोषणा गरिएको थियो । आर्थिक वर्ष २०८३/८४ सम्ममा महानगरपालिकालाई बालमैत्री घोषणा गर्ने उद्देश्यका साथ बालमैत्री वडा घोषणा गरिएको हो ।

नगरप्रमुख दाहालले महानगरपालिकामा बालमैत्री शासन लागू गर्न र बालश्रम मुक्त बनाउने योजनाका साथ काम भइरहेको बताउनुभयो । सामूहिक एकता र बलले मात्र कामहरू सफल हुने उल्लेख गर्दै उहाँले घोषणा भइसकेपछि यसको कार्यान्वयनमा वडा र टोलबासीको सहयोग अपरिहार्य रहेको बताउनुभयो । बालबालिकाको अधिकार सुनिश्चित गर्नका लागि महानगरपालिकाले सक्दो प्रयास गरेको उहाँको भनाइ थियो । 

बालमैत्री वडा घोषणापछि देखिने चुनौती समाधान गर्न अभिभावकहरूको महत्वपूर्ण भूमिका रहने महानगरपालिका उपप्रमुख चित्रसेन अधिकारीले बताउनुभयो । बाल अधिकार संरक्षणका लागि स्थानीय बाल अधिकार समिति सधैँ तयार रहेको उहाँको भनाइ थियो । 

महानगरपालिकाको स्वास्थ्य तथा सामाजिक महाशाखा निर्देशक शान्ताकुमारी पौडेलले बालमैत्री वडा घोषणाका लागि बालमैत्री स्थानीय शासनअन्तर्गत ५१ वटा सूचकाङ्क पूरा गर्नुपर्ने जानकारी दिनुभयो । स्थानीय बाल अधिकार समितिले यस वर्ष थप दुईवटा वडालाई बालमैत्री घोषणा गर्ने तयारी गरिरहेको पनि उहाँको भनाइ थियो । 

महानगरपालिकाका प्रमुख प्रशासकीय अधिकृत लक्ष्मीप्रसाद पौडेल, चितवनका सहायक प्रमुख जिल्ला अधिकारी चिरञ्जीवी शर्मा, वडा नम्बर १४ का अध्यक्ष राजेन्द्र शाखी, वडा नम्बर ६ का अध्यक्ष कृष्णलाल श्रेष्ठ, वडा नम्बर ६ का पूर्वअध्यक्ष हरिविलाश कोइराला, नेपाली कांग्रेसका वडा सभापति प्रकाश अधिकारी लगायतले धारणा राख्नुभएको थियो ।