पुथाउत्तरगंगा गाउँपालिकामा माओवादीकेन्द्रका बुढा पुन विजयी

रुकुम पूर्व । रुकुम पूर्वको पुथाउत्तरगंगा गाउँपालिकामा नेकपा माओवादी केन्द्रबाट नरपूरा बुढा पुन विजयी हुनुभएको छ । उपाध्यक्ष पदका लागि आइतबार भएको उपनिर्वाचनमा माओवादीकी बुढा पुनले ३ हजार ६ सय २७ मत ल्याएर विजयी हुँदा गठबन्धनकी केशकुमारी तुलाचनले २ हजार १ सय २८ मत मात्र प्राप्त गर्नुभयो । माओवादी उम्मेदवार नरपूरा १ हजार ४ सय ९९ मतान्तरले विजयी हुनुभएको हो । पुथाउत्तरगंगामा कुल ११ हजार १ सय ८० जना मतदाता रहेकामा ५ हजार ९ सय २१ मत खसेको थियो ।

उपाध्यक्ष भूपेन्द्रा बुढाको गत भदौ २८ गते बागलुङमा भएको गाडी दुर्घटनामा मृत्यु भएको थियो । उहाँ सँगै पुथाउत्तरगंगा गाउँपालिका वडा नम्बर २ का अध्यक्ष जसबहादुर श्रीपालीको पनि मृत्यु भएको थियो । उक्त वडामा यसअघि नै माओवादी केन्द्रका जगत घर्ती निर्विरोध निर्वाचित भइसक्नुभएको छ ।यहाँ २०७९ मा भएको निर्वाचनमा माओवादी नै विजयी भएको थियो ।