सहमति र सहकार्यका आधारमा सरकार अघि बढिरहेको छ : उपप्रधानमन्त्री सिंह

कास्की । उपप्रधानमन्त्री एवं सहरी विकास मन्त्री प्रकाशमान सिंहले मुलुकमा स्थायित्व कायम गर्न, आर्थिक समृद्धि हासिल गर्न र जनताका भावनाअनुरूप काम गर्न संसद्का दुई ठूला दल मिलेर वर्तमान सरकार गठन भएको बताउनुभएको छ । 

नेपाल प्रेस युनियन कास्कीले आज पोखरामा आयोजना गरेको पत्रकार भेटघाट कार्यक्रममा उपप्रधानमन्त्री सिंहले सहमति र सहकार्यका आधारमा सरकार अघि बढिरहेको बताउनुभयो ।

उहाँले सरकारले सहकारीसहित अन्य अनियमितताको कानुनअनुसार अनुसन्धान अघि बढाएको बताउनुभयो । उपप्रधानमन्त्री सिंहले पोखरा अन्तर्राष्ट्रिय विमानस्थल पूर्ण क्षमतामा सञ्चालन गर्न सरकार प्रयासरत बताउनुभयो ।

बिआरआई परियोजनाअन्तर्गत सडक, सुरुङलगायत भौतिक पूर्वाधारका क्षेत्र छनोट गरिनुपर्नेमा जोड दिनुहुँदै उपप्रधानमन्त्री सिंहले बेल्ट एण्ड रोड इनिसिएटिभ (बिआरआई)अन्तर्गत अनुदान नै उपयुक्त हुने विचार व्यक्त गर्नुभयो । 

“वर्तमान आर्थिक अवस्थाका कारण ऋणका लागि ऋण लिनु उपयुक्त नहुने देखिन्छ । परियोजना सम्पन्न हुन समय लाग्ने र पछि सरकारलाई ऋण तिर्न गाह्रो हुने भएकाले अनुदान लिनु उपयुक्त हुन्छ”, उहाँले भन्नुभयो ।