विश्व वातावरण दिवस : इलामका विभिन्न स्थानमा वृक्षारोपण

इलाम । आज विश्व वातावरण दिवस । ‘हाम्रो भूमि, हाम्रो भविष्य’ भन्ने मूल नारासाथ दिवस मनाइँदैछ ।

दिवसको अवसरमा इलामको विभिन्न स्थानमा वृक्षारोपण गरिएको छ । इलाम नगरपालिकाले बुधबार बिहान इलाम चिया बगान आसपास वृक्षारोपण गरेको छ । सत्य साई केन्द्र र हरित नगर महिला समूहको सह आयोजनामा भएको कार्यक्रममा नेपाल प्रहरी , सशस्त्र प्रहरी , नेपाली सेना सहित सरकारी कार्यालयका प्रतिनिधि, वातावरण क्षेत्रमा काम गर्ने सङ्घसंस्थाका प्रतिनिधिको उपस्थिति रहेको थियो ।

वृक्षारोपण कार्यक्रमपछि इलाम नगरपालिकाका मेयर केदार थापाले मानवीय क्रियाकलापले नै वातावरण सङ्कटमा परेकाले संरक्षणमा पनि सरकार र समुदाय लाग्नुपर्ने बताउनुभयो । उपमेयर विष्णु दाहालले नगरपालिकाले वातावरण संरक्षण र जैविक कृषिमा काम गरिरहेको बताउनुभएको छ ।

यसैगरी इलाम नगरपालिका वडा न ९ स्थित खहरे पुवाजुङ महिला सामुदायिक बनमा डिभिजन वन कार्यालय इलामको आयोजना र इलामस्थित नेपाली सेनाको रण शार्दूल गणले वृक्षारोपण गरेको छ । रोपण गरिएको बिरुवा हेरचाह र संरक्षण सामुदायिक बन उपभोक्ता समितिले लिएको छ ।