प्रभावित क्षेत्रमा उद्धार र राहतमा खटिन कांग्रेसको अपील

काठमाडौँ I नेपाली काँग्रेसले भूकम्पका कारण जाजरकोट र रुकुम (पश्चिम) लगायतका क्षेत्रमा ठुलो सङ्ख्यामा मानवीय क्षति भएको र सयौँको सङ्ख्यामा घाइते भएको घटनाप्रति दुःख व्यक्त गरेको छ । 

जाजरकोटको बारेकोट गाउँपालिका–१ रामीडाँडा केन्द्रबिन्दु भएर गए राति ११ः४७ बजे गएको ६.४ म्याग्निच्युडको भूकम्पका कारण ठुलो जनधनको क्षति भएको छ । काँग्रेस सभापति एवं पूर्व प्रधानमन्त्री शेरबहादुर देउवाले आज विज्ञप्तिमार्फत सम्पूर्ण पीडितको संवेदनशीलताप्रति पार्टी र आफ्नो व्यक्तिगत तर्फबाट सहानुभूति प्रकट गर्नुभएको छ । साथै उहाँले भूकम्पबाट प्रभावितलाई सुरक्षित स्थलतर्फ तत्काल स्थानान्तरण गर्न, तीव्र गतिमा उद्धारको कार्य गर्न, घाइतेको उपचार तथा राहतमा जुट्न सरकारसँग माग गर्नुभएको छ ।

सभापति देउवाले काँग्रेसका सम्पूर्ण पार्टी निकायलाई भूकम्प प्रभावित क्षेत्रमा सक्रियतापूर्वक उद्धार, राहत र पुनर्निर्माणमा जुट्न निर्देशन दिँदै यस  विपत्तिको सामना संयम, धैर्यता र एकतापूर्वक गर्न सम्पूर्णमा अपिल गर्नुभएको छ । उहाँले भूकम्पमा परी दिवङ्गत हुनु भएकाहरूप्रति श्रद्धाञ्जली व्यक्त गर्दै मृतकको आत्माको चीर शान्तिको कामना तथा शोक सन्तप्त परिवारजनप्रति समवेदना प्रकट गर्नुभएको छ । उहाँले घाइतेको शीघ्र स्वास्थ्यलाभको कामना गर्नुभएको छ ।