काभ्रेपलाञ्चोकमा आयुर्वेद उपचार र औषधी प्रयोग गर्नेको सङ्ख्या बढ्यो

काभ्रेपलाञ्चोक । काभ्रेपलाञ्चोक जिल्लामा आयुर्वेद उपचार र औषधी प्रयोग गर्नेको सङ्ख्या पछिल्लो वर्ष ह्वात्तै बढेको पाइएको छ ।

जिल्लामा कोभिड सुरु भएदेखि यता आयुर्वेद उपचार र औषधी प्रयोग गर्नेको सङ्ख्यामा उल्लेख्य वृद्धि भएको हो ।

काभ्रेपलाञ्चोक जिल्ला आयुर्वेद स्वास्थ्य केन्द्र बनेपाका प्रमुख डाक्टर वशंवदाम्बा कौडिण्यायनीले चालु आर्थिक वर्षको अन्तसम्ममा १५ हजार भन्दा बढीको सङ्ख्या आयुर्वेद उपचार तथा औषधी प्रयोग गर्नेको सङ्ख्या पुग्ने बताउनुभयो ।

जबकि कोभिड अगाडी यति धेरै आयुर्वेद उपचार र औषधी प्रयोग हुने गरेको थिएन । कोभिडको बेला मानिसहरूले मेडिकलको औषधि भन्दा जुडिबुटीलाई बढी प्रयोग गरेका कारण पनि त्यसयता यसको प्रयोगमा बढोत्तरी आएको बताइएको छ ।

सर्वसाधारणले आयुर्वेद उपचार र औषधीको प्रयोग बढाएसँगै सरकारले नयाँ प्रविधि समेत भित्र्याएको जिल्ला आयुर्वेद स्वास्थ्य केन्द्र बनेपाका प्रमुख डाक्टर कौडिण्यायनीले जानकारी दिनुभयो ।

बागमती प्रदेशमा मुख्यमन्त्री स्वास्थ्य कार्यक्रममा समेत आयुर्वेदलाई समावेश गरिएको छ । काभ्रेपलाञ्चोक जिल्लाको बनेपामा जिल्ला आयुर्वेद स्वास्थ्य केन्द्र रहेको छ । धुलिखेल, पाँचखाल, नमोबुद्ध र रोशी गाउँपालिकामा आयुर्वेद औषधालय रहेको छ । त्यसैगरी ४ वटा नागरिक आयुर्वेद स्वास्थ्य केन्द्र रहेका छन् । मण्डनदेउपुर र पनौती नगरपालिका तथा भुम्लु र बेथानचोक गाउँपालिकामा नागरिक आयुर्वेद स्वास्थ्य केन्द्र रहेका छन् ।

बनेपामै २५ बेड क्षमताको आयुर्वेद अस्पताल निर्माणका प्रक्रिया समेत अघि बढाइएको छ । १५ रोपनी जमिनमा निर्माण हुने यो अस्पताल सुरुमा २५ बेडको हुनेछ । बनेपा नगरपालिकाका मेयर शान्तिरत्न शाक्यले आयुर्वेद अस्पताल बनेपामै निर्माण गर्ने प्रतिबद्धता जनाउनुभयो ।

धुलिखेलमा पञ्जलीले २५ बेड क्षमताको आयुर्वेद अस्पताल सञ्चालन गरिरहेको छ । बनेपामा विशेषज्ञ सेवा सहितको ४ वटा आयुर्वेदका पोलिक्लिनिक सञ्चालनमा रहेका छन् । बनेपाबाटै अकुपञ्चर विधि मार्फत उपचार सुरु हुनेछ भएको छ ।