क्षयरोग मुक्त नेपाल घोषणा अभियानको शुभारम्भ

सुर्खेत । स्वास्थ्य तथा जनसङ्ख्या मन्त्री विरोध खतिवडाले आज सुर्खेतको वीरेन्द्रनगरबाट ‘क्षयरोग मुक्त नेपाल घोषणा अभियान’ को शुभारम्भ गर्नु भएको छ । 

राष्ट्रिय क्षयरोग नियन्त्रण केन्द्र भक्तपुरले सुर्खेतको वीरेन्द्रनगरमा आयोजना गरेको ‘क्षयरोग अन्त्यका लागि लगानी बढाऔँ, जीवन बचाऔँ’ भन्ने नाराका साथ क्षयरोग मुक्त नेपाल घोषणा अभियानको शुभारम्भ गर्दै मन्त्री खतिवडाले अबको चार वर्ष भित्र देशबाटै सधैँका लागि क्षयरोग उन्मूलन गर्ने राष्ट्रिय लक्ष्य राखिएको बताउनु भयो । 

उहाँले क्षयरोग उन्मूलनका लागि सरकारले दक्ष जनशक्ति, निःशुल्क औषधिसँगै उच्च प्रविधि मार्फत रोग पत्ता लगाउने विभिन्न उपाय उपलब्ध गराउँदा–गराउँदै पनि अझै समाजमा आधा भन्दा बढी क्षयरोगीहरू उपचार गर्न नआएको जनाउनु भयो । क्षयरोगको उपचार गराउन नआएका मानिसले नै क्षयरोग फैलाई रहेकाले अब स्थानीय तह, प्रदेश र सङ्घ सरकारसँगै आम नागरिक क्षयरोग मुक्त नेपाल बनाउनका लागि जुट्न उहाँले आग्रह गर्नु भयो । 

कार्यक्रममा कर्णाली प्रदेशका सामाजिक विकास मन्त्री यज्ञबहादुर बुढा क्षेत्रीले प्रदेशमा अहिले पनि करिब १२ सय क्षय रोगका बिरामी मध्ये ६२ प्रतिशत पुरुष र ३५ प्रतिशत महिला रहेको जानकारी दिनु भयो । उहाँले कर्णालीबाट क्षयरोग मुक्त नेपाल घोषणा अभियानको शुभारम्भ गरेकोप्रति धन्यवाद दिँदै यहाँको गरिबी, अशिक्षा र पूर्वाधार विकासमा समेत ध्यान दिन सङ्घीय सरकारलाई आग्रह गर्नु भयो । 

कार्यक्रममा राष्ट्रिय क्षयरोग नियन्त्रण केन्द्रका निर्देशक डा. सञ्जयकुमार ठाकुर र केन्द्रका योजना तथा अनुगमन शाखा प्रमुख मुक्ति खनालले छ महिनासम्म बीचमा नछुटाई औषधी खाइरहे सामान्यतः निको हुने यो रोग निर्मूल पार्ने अभियान चलेपनि प्रभावकारी नहुँदा अब योजनाबद्ध ढङ्गले रोग अन्त्यका लागि जुट्न आग्रह गर्नु भयो ।  

नेपालको गरिबी, चेतनाको कमी र कमजोर स्वास्थ्य सेवा प्रणालीका कारण नियन्त्रण कठिन रहेको भन्दै क्षयरोगको प्रकोप खासगरी पोषण र चेतनाको कमी भएकै समुदाय पर्ने गरेको उहाँको भनाइ थियो ।