निर्वाचन आचार संहिता कडाइका साथ लागू गरिने : प्रमुख निर्वाचन आयुक्त थपलिया

धनगढी  । प्रमुख निर्वाचन आयुक्त दिनेश कुमार थपलियाले निर्वाचन आचार संहिता कडाइका साथ लागू गरिने बताउनुभएको छ ।

धनगढीमा  आज  आयोजित निर्वाचन आचार संहिताको प्रभावकारी कार्यान्वयन र सरोकारवालाहरूको भूमिका विषयक अन्तरक्रिया कार्यक्रममा उहाँले निर्वाचन आचार संहिताको पालना गर्नु सबैको जिम्मेवारी (दायित्व)भएको बताउनुभयो ।

निर्वाचन आचार संहिता सम्बन्धीको विषय अहिले अदालतमा विचाराधीन रहेको उल्लेख गर्नुहुँदै प्रमुख निर्वाचन आयुक्त थपलियाले अदालतबाट व्याख्यासहित निकास आउने विश्वास व्यक्त गर्नुभयो ।

उहाँले स्थानीय तहको निर्वाचन स्वच्छ, निष्पक्ष, भयरहित वातावरणमा सम्पन्न गर्न निर्वाचन आयोग लागिपरेको बताउनुभयो । 

कार्यक्रममा सुदूरपश्चिम प्रदेशका मुख्यमन्त्री त्रिलोचन भट्टले निर्वाचन सम्बन्धी नीति, नियम, विधि-प्रक्रियासँगै निर्वाचन आचार संहिताको पालना गर्न र गराउनका लागि प्रदेश सरकार प्रतिबद्ध रहेको बताउनुभयो । उहाँले निर्वाचन आचार संहिताको पालना गर्नु सबैको साझा कर्तव्य भएको बताउनुभयो ।