सुशासन सरकारको शीर्ष प्राथमिकतामा : अर्थमन्त्री वाग्ले

काठमाडौँ । अर्थमन्त्री डा. स्वर्णिम वाग्लेले सुशासन सरकारको शीर्ष प्राथमिकता रहेको बताउनुभएको छ । 

प्रतिनिधि सभामा आर्थिक वर्ष २०८३/०८४ का लागि विनियोजन विधेयकका सिद्धान्त र प्राथमिकताका सम्बन्धमा सांसदहरुले उठाउनुभएको प्रश्नको जवाफ दिँदै अर्थमन्त्री वाग्लेले सुशासनविना दिगो आर्थिक वृद्धि सम्भव नहुने भन्दै सरकार सिष्टम सुधारमार्फत आर्थिक सुधारको बाटोमा अघि बढिरहेको स्पष्ट पार्नुभयो । 

अर्थमन्त्री वाग्लेले सरकारले अघि सारेको अर्थतन्त्रको पुनर्संरचना र एकीकृत पूर्वाधार लगायतका प्राथमिकताले हजारौँ युवाहरूका लागि रोजगारी सिर्जनाका साथै नागरिकको जीवनस्तर सुधार गर्न सहयोग पुग्ने पनि बताउनुभयो । 

बैठकमा अर्थमन्त्री वाग्लेले सरकारले सामाजिक न्यायलाई आर्थिक उन्नयनसँग जोड्ने नीति लिएको बताउनुभयो । 

प्रतिनिधिसभाको अर्को बैठक जेठ ६ गते, भोलि बिहान ११ बजे बस्नेछ ।