समता महिला विद्यालयमा प्रेरणादायी सफलता

नवलपरासी (पश्चिम) ।पश्चिम नवलपरासीको सुनवलमा रहेको लुम्बिनी प्रदेशकै पहिलो महिला विद्यालयका रूपमा परिचित लुम्बिनी समता महिला विद्यालयले यस वर्षको एसईई परीक्षामा प्रेरणादायी सफलता हासिल गरेको छ । विद्यालयबाट पहिलो पटक एसईईमा सहभागी भएका सात महिलामध्ये चार जना उत्तीर्ण भएका छन् ।

उमेरले नेटो काटिसकेका आमा र बुहारीहरूले हासिल गरेको यो सफलताले “पढ्नका लागि उमेर बाधक हुँदैन” भन्ने सन्देशलाई थप बलियो बनाएको छ ।

विद्यालयका अनुसार सहभागी सात जनामध्ये चार जना उत्तीर्ण भएका छन् भने बाँकी तीन जनाले केही विषयमा पुनः परीक्षा दिनुपर्ने भएको छ । पहिलो प्रयासमै आएको नतिजालाई विद्यालयले ऐतिहासिक उपलब्धिका रूपमा लिएको छ ।

विद्यालयकी प्रधानाध्यापक राधिका रोकाले सिक्ने इच्छाशक्ति भए उमेरले कहिल्यै नछेक्ने बताउनुभयो ।
“हाम्रा आमा दिदीबहिनीहरूले सिक्नका लागि उमेरले रोक्दैन भन्ने प्रमाणित गर्नुभएको छ । यो सफलताले आगामी दिनमा अझ मेहनत गर्ने ऊर्जा दिएको छ,” उहाँले भन्नुभयो ।

यस विद्यालयमा अध्ययन गर्ने महिलाहरूको उमेर १८ वर्षदेखि ७० वर्षसम्म रहेको छ । घरायसी जिम्मेवारीका कारण पढाइ बीचमै छोडेका महिलादेखि नातिनातिना खेलाउने उमेरका आमासमेत अहिले किताब–कापी बोकेर विद्यालय पुग्ने गरेका छन् ।

सुनवल नगर प्रमुख बिमला अर्यालले विद्यालयको सफलताले नगरकै गौरव बढाएको बताउनुभयो ।
“महिलाले चाह्यो भने घर मात्रै होइन, शिक्षाको क्षेत्रमा पनि उत्कृष्ट नतिजा दिन सक्छन् भन्ने यो उदाहरण हो । पहिलो सहभागितामै यस्तो सफलता आउनु अत्यन्त सकारात्मक कुरा हो,” उहाँले भन्नुभयो ।

उहाँका अनुसार यो नतिजाले महिलाको शिक्षामा थप लगानी गर्न स्थानीय सरकारलाई हौसला मिलेको छ ।

हाल कक्षा ४ देखि १० सम्म पढाइ हुने यस सामुदायिक विद्यालयमा करिब १०० जना महिलाहरू अध्ययनरत छन् । सीमित स्रोतसाधन र केवल ६ जना शिक्षकको भरमा विद्यालयले हासिल गरेको उपलब्धिलाई अर्थपूर्ण रूपमा हेरिएको छ ।

विगतमा विभिन्न सामाजिक तथा पारिवारिक कारणले विद्यालय जान नपाएका महिलाहरूका लागि अहिले यो विद्यालय आशाको केन्द्र बनेको छ । सुरुमा आमा र बुहारीहरू विद्यालय जाँदा अचम्म मान्ने समाज अहिले उनीहरूको सफलतामा गर्व गर्न थालेको छ ।

समता महिला विद्यालयको यो सफलताले लुम्बिनी प्रदेशभरि नै सकारात्मक सन्देश फैलाएको छ । “सिकाइको यात्रा सुरु गर्न कहिल्यै ढिला हुँदैन” भन्ने सन्देशलाई यस सफलताले थप बलियो बनाएको छ ।