रबिको ‘मिश्रित खेती’मा २७ प्रजातिका नगदेबाली

झापा । मेचीनगर नगरपालिका(४ बाहुनडाँगीका किसान रबि नेपालले एउटै जमिनमा २७ प्रजातिका नगदेबाली लगाएर आधुनिक मिश्रित खेतीका लागि उदाहरण बन्नुभएको छ । विगत १३ वर्षदेखि व्यावसायिक कृषिमा होमिनुभएका उहाँले १२ बिघा जमिनको हरेक कुनालाई उत्पादनसँग जोडेर मिश्रित नमुना खेती गर्नुभएको हो । 

चिया खेतीबाट कृषियात्रा सुरु गर्नुभएको नेपालले अहिले एउटै जमिनमा चिया, रबर, अगरउड, अमला, कटहर, तेजपत्तालगायत दर्जनौँ नगदेबालीलाई एकसाथ हुर्काइरहनुभएको छ । उहाँले पहिलो चरणमा चिया रोपेको र चिया बगानभित्र मिश्रित नगदेबाली हुर्काएको बताउनुभयो । 

चियाले तीन वर्ष, अमलाले पाँच वर्ष, कटहरले चार वर्ष, रबरले पाँचौँ वर्ष र तेजपत्ताले तेस्रो वर्षदेखि उत्पादन दिइरहेका नेपालले जानकारी दिनुभयो । “सुरुमा लगानी र मेहनत बढी हुन्छ, खनजोतदेखि गोडमेल र बिरुवा हुर्काउन समय लाग्छ”, उहाँले भन्नुभयो, “तीन वर्षपछि प्रतिफल दिन सुरु हुन्छ र सात वर्ष पुग्दा सबै बालीले आय दिन थाल्छन् ।” उहाँका अनुसार अहिले बगानमा २७ प्रजातिका नगदेबाली छन् । 

औषधीय गुण भएका अर्जुन, मोरिङ्गा, रुद्राक्षदेखि दैनिक भान्सामा चाहिने दालचिनी र कागतीसम्मले उत्पादन दिइरहेका नेपालीले जानकारी दिनुभयो । उहाँको खेती गर्ने शैली नौलो र लोभलाग्दो छ । ठूलो सुपारी बगानभित्र मरिचको लहलह खेती छ । मरिचका लहरा सुपारीकै बोटमा आश्रित भएर फलेका छन् । 

पछिल्लो समय उहाँले चिया बगानभित्र एउटा नयाँ प्रयोगका रूपमा नरिवल खेती सुरु गर्नुभएको छ । कृषि विज्ञहरूको सल्लाहमा उहाँले चिया बगानभित्र दुई÷दुई बुट्टा हटाएर नरिवलका बिरुवा रोप्न थालेको बताउनुभयो । “चिया बगानभित्र घुसुवा बालीका रूपमा नरिवल खेतीको यो पहिलो प्रयोग हो । यसले झापाको कृषि पर्यटन र उत्पादनमा नयाँ आयाम थप्ने विश्वास छ”, उहाँले भन्नुभयो ।

बाहुनडाँगी क्षेत्रका किसान हात्ती, चितुवा, बाँदरलगायत जङ्गली वन्यजन्तुका कारण प्रभावित छन् । चिया र नरिवलजस्ता बालीलाई हात्ती र बाँदरले खासै क्षति नपुर्‍याउने भएकाले यसलाई वैकल्पिक खेतीका रूपमा किसानले उपयोग गर्दै आएका नेपालको भनाइ छ । 

माटो परीक्षणले पनि पूर्वपश्चिम राजमार्गको बाहुनगाँडी, शनिश्चरे, बुधबारेलगायत क्षेत्रमा नरिवल खेती उपयुक्त देखिएको नेपालले जानकारी दिनुभयो । एउटै नरिवलको बोटबाट वार्षिक रु १७ देखि १८ हजारसम्म आम्दानी हुने उहाँको भनाइ छ ।

उहाँले गत वर्षदेखि सुपारी बगानभित्र नरिवल रोप्न सुरु गर्नुभएको हो । “एक हजार बोट रोप्ने योजना छ, गत वर्ष ३०० बिरुवा रोपेँ”, नेपालले भन्नुभयो, “यसवर्ष ७०० बिरुवा रोप्छु ।” नरिवलको पानीका लागि फल काँचैमा बिक्री हुने भएकाले बजार अभाव नहुने उहाँको बुझाइ छ । बजारमा नरिवलभित्रको पानीका माग बढ्दै गएको उहाँले बताउनुभयो ।

उहाँको १३ वर्षको मिश्रित खेतीको अनुभवमा नगदेबालीको उत्पादनमा बजारको कुनै समस्या छैन । सुपारी र तेजपत्ता बोटबाटै बिक्री हुन्छन् भने झापामा चिया र रबर प्रशोधनका प्रशस्त उद्योग खुलिसकेका छन् । “बजार खोज्नु र पहिल्याउन चासो दिनुपर्छ, बारीमा उत्पादन गरेर घरमा उपरखुट्टी लगाएर बसेर मात्र हुँदैन”, नेपालले भन्नुभयो, “एक बिघा जमिनमा व्यवस्थित मिश्रितखेती गर्ने हो भने वार्षिक रु आठदेखि नौ लाख सहजै कमाउन सकिन्छ ।”

आफ्नै माटोमा पसिना बगाउने हो भने पैसा कमाउन युरोप वा अमेरिका धाउनु नपर्ने उदाहरण उहाँको सफल कृषि कर्म बनेको छ । उहाँले युवापुस्तालाई मिश्रित खेतीप्रति आकर्षित गर्न राज्यले प्रोत्साहनको नीति तथा कार्यक्रम ल्याउनुपर्ने बताउनुभयो ।

“तीन महिनामा कमाउनेलाई तरकारी, छ महिनामा चाहनेलाई अन्न र एक वर्ष कुर्नेलाई जडीबुटी ठिक छ”, खेतीबाट हुने आम्दानीका बारेमा जानकारी दिँदै उहाँले भन्नुभयो, “तर, तीन(चार वर्ष धैर्य गरेर मिश्रितखेती गर्ने हो भने यसले ५० वर्षसम्म निरन्तर आम्दानी दिइरहन्छ ।” रासस