बुबा छोरा र आमा छोरी सँगै निर्वाचन सुरक्षामा खटिए

अछाम ।  प्रतिनिधिसभा सदस्य निर्वाचनलाई शान्तिपूर्ण, निष्पक्ष र व्यवस्थित रूपमा सम्पन्न गराउन देशभर अस्थायी रूपमा ‘निर्वाचन प्रहरी’ भर्ना गरिएको छ।

यही क्रममा खटिएका सुरक्षाकर्मीमध्ये एक बाबुछोरा र अर्कोतर्फ आमाछोरीसँगै जिम्मेवारीमा उभिएको दृश्यले सबैको ध्यान तानेको छ।

अछामको मङ्गलसेन नगरपालिका–५, अछामका तेजे नगर्ची र उहाँका छोरा अजय नगर्ची यस पटक निर्वाचन प्रहरीका रूपमा सँगै खटिनुभएको छ । एउटै पोसाक, एउटै जिम्मेवारी र एउटै लक्ष्यसहित उहाँहरू मतदान केन्द्रको सुरक्षामा तैनाथ हुनुभएको हो।

त्यस्तै, बझाङको खप्तड छान्ना गाउँपालिका–५ का कल्पनादेवी कार्की र उहाँकी छोरी पवित्राकुमारी कार्की पनि अछाममा निर्वाचन प्रहरीका रूपमा खटिनुभएको छ । आमा र छोरी दुवै एउटै कार्यक्षेत्रमा रहेर मतदान केन्द्रको सुरक्षामा सक्रिय हुनुभएको छ । 

निर्वाचनका बेला अस्थायी रूपमा भर्ना गरिने निर्वाचन प्रहरीहरूले मतदान केन्द्रको सुरक्षादेखि भीड व्यवस्थापनसम्मका जिम्मेवारी सम्हाल्ने गर्दछन् ।