पत्रकार महासङ्घ काठमाडौँ शाखाको आयोजनामा रक्तदान

काठमाडौँ ।  ‘जेनजी’ प्रदर्शनपछि रगत अभावको अवस्थालाई मध्यनजर गर्दै नेपाल पत्रकार महासङ्घ काठमाडौँ शाखाले रक्तदान कार्यक्रम सम्पन्न गरेको छ ।

आज भृकुटीमण्डपमा आयोजित कार्यक्रममा ५५ जनाले स्वैच्छिक रूपमा रक्तदान गरेका छन् । त्यस क्रममा पत्रकारदेखि राजनीतिकर्मीले पनि सहभागिता जनाउनुभएको थियो । नेतृ डा वृन्दा पाण्डेले ३८औँ पटक रक्तदान गर्नुभयो । उहाँले ५०औँ पटकसम्म निरन्तर रक्तदान गर्ने इच्छा व्यक्त गर्दै जीवन बचाउने सबैभन्दा सरल मानवीय सेवा रक्तदान भएको उल्लेख गर्नुभयो । 

महासङ्घ काठमाडौँ शाखाका अध्यक्ष शोभा अर्याल र सचिव रमेशकुमार बोहराले रक्तदान गरी सुरु भएको कार्यक्रममा प्रेस चौतारी नेपालका अध्यक्ष गणेश पाण्डे, शाखाका पूर्व अध्यक्ष युवराज विद्रोही र राससका वरिष्ठ समाचारदाता प्रकाश सिलवाल लगायतले रक्तदान गर्नुभएको थियो । 

शाखा अध्यक्ष अर्यालले ‘जेनजी’ प्रदर्शनपछि रेडक्रस र अस्पतालमा देखिएको रगत अभावमा सहयोग पुगोस् भन्ने उद्देश्यले कार्यक्रम गरिएको बताउनुभयो । उहाँले पत्रकार र सामाजिक अभियन्ताको सक्रिय सहभागितामा हुने यस्ता कार्यक्रमले समाजमा रक्तदानप्रति जागरूकता र प्रेरणा थप फैलिने विश्वास व्यक्त गर्नुभयो ।  

महासङ्घका केन्द्रीय अध्यक्ष निर्मला शर्माले सहभागी सबैलाई प्रमाणपत्र प्रदान गर्दै जिल्ला शाखाले निरन्तर गर्दै आएको रचनात्मक तथा मानवीय कार्यको प्रशंसा गर्नुभयो ।