‘राष्ट्रिय स्वर्ण बिन्दु प्राशन’ प्रति नागरिकको चासो

मोरङ । सरकारले प्राचीन चिकित्सा पद्धतिलाई प्राथमिकता दिएर राष्ट्रिय कार्यक्रमको रूपमा ‘राष्ट्रिय स्वर्ण बिन्दु प्राशन’ कार्यक्रम सुरु गरेपछि यसप्रति सर्वसाधारण नागरिकको चासो बढ्दै गएको छ । 

आधुनिक एलोप्याथी अभ्यासलाई पूर्ण रूपमा नै अङ्गीकार गरी औषधि, शल्यक्रिया र उच्च प्राविधिक उपचारहरूको प्रयोग भइरहँदा स्वास्थ्य तथा जनसङ्ख्या मन्त्रालयले यो कार्यक्रम छ महिनाअघि सुरु गरेको थियो ।

जस अनुसार हिजो विराटनगरमा चौथो चरणको कार्यक्रम आयोजना गरिएको हो । जिल्ला आयुर्वेद स्वास्थ्य केन्द्र, कार्यालय प्रमुख डा.राम प्रबोध चौधरीका अनुसार अघिल्ला कार्यक्रम भन्दा अहिले धेरैमा चासो देखिएर सेवाग्राही आएका हुन् । आयुर्वेद पञ्चकर्मका एम.डी. चौधरीका अनुसार राष्ट्रिय स्वर्ण बिन्दु प्राशन कार्यक्रमलाई मोरङमा अझै व्यवस्थित र एकरूपताका साथ सञ्चालन गर्ने तयारी भइरहेको छ ।

यहाँका अनुसार अब सरकारले ६ महिनादेखि ५ वर्षसम्मका बालबालिकालाई एक विशेष आयुर्वेदिक औषधि खुवाउने छ । शास्त्रीय विधिसम्मत बिहानको समयमा पुष्य नक्षत्रको दिन पारेर यो औषधी खुवाइने छ । स्वर्ण प्राशन आयुर्वेदको एक प्राचीन चिकित्सा पद्धति हो, जसलाई आधुनिक खोपको अवधारणासँग तुलना गरिन्छ । बालबालिकाको शारीरिक तथा मानसिक विकासलाई बढवा दिनु र उनीहरूलाई विभिन्न रोगबाट बचाउन यसको प्रयोग गर्ने गरिन्छ ।

‘स्वर्ण बिन्दु प्राशन’ करिब पाँच हजार वर्ष पुरानो आयुर्वेदिक ग्रन्थ ‘काश्यप संहिता’ मा वर्णन गरिएको एक परम्परागत विधि मानिन्छ । प्रशोधित स्वर्ण भस्मले शरीरको रोग प्रतिरोधात्मक क्षमतालाई सन्तुलन र नियमन गर्न मद्दत गर्ने मान्यता छ । मस्तिष्कको क्षमता बढाउने जडीबुटीयुक्त ब्राह्मी घृतले स्नायु कोषहरूको रक्षा गर्ने र स्मरण शक्ति बढाउन भूमिका खेल्छ । शुद्ध मह आफैँमा एक प्राकृतिक जीवाणुरोधी तत्त्व हो, जसले सङ्क्रमणबाट बचाउँछ ।

आधुनिक वैज्ञानिक दृष्टिकोणबाट हेर्दा ‘स्वर्ण बिन्दु प्राशन’ एक अत्यन्तै परिष्कृत ‘नानो–मेडिसिन’ र ‘न्युरो–इम्युनोमोडुलेटर’ फर्मुलेसन मानिएको छ ।