एनपीएलको ट्रफी टुरले बाँकेमा उत्साह थपियो, खेल प्रेमीको घुइँचो
बाँके । नेपाल प्रिमियर लिग (एनपीएल)को दोस्रो संस्करण सुरु हुनुअघि बाँके र बर्दियाका विभिन्न स्थानमा गरिएको ट्रफी टुर कार्यक्रमले खेल प्रेमीहरूमा उत्साह थपेको छ। ट्रफी टुर कार्यक्रम अन्तर्गत लुम्बिनी लायन्सको टिम ट्रफीसहित बाँकेका दुई प्रमुख शहर कोहलपुर र नेपालगञ्ज तथा बर्दियाको बाँसगढी पुगेको थियो।
एनपीएलप्रति सर्वसाधारणको समर्थन आर्जन गर्ने उद्देश्यले गरिएको ट्रफी टुर अन्तर्गत ट्रफीलाई कोहलपुर चौराह, कोहलपुरको क्रिकेट मैदान, नेपालगञ्जको बागेश्वरी मन्दिर, मङ्गलप्रसाद मावि र नेपालगञ्ज रङ्गशालासम्म पुर्याइएको थियो।
कोहलपुर चौराहामा आयोजित विशेष कार्यक्रममा कोहलपुर नगरपालिकाका उपप्रमुख सङ्गीता पौडेल, नेपाल क्रिकेट संघ (क्यान)का केन्द्रीय छनोट समितिका सदस्य तथा पूर्व कप्तान लेखबहादुर क्षेत्री, र नेपाली महिला क्रिकेट टिमकी पूर्व उपकप्तान ममता थापाले संयुक्त रूपमा ट्रफीलाई स्वागत गर्नुभयो।
उपमेयर सङ्गीता पौडेलले खेलकुदमा स्थानीय तहको निरन्तर समर्थन रहने बताउनुभयो ।
एनपीएलको दोस्रो संस्करण सुरु हुनुअघि गरिएको यो ट्रफी टुरले प्रतियोगिताप्रतिको उत्सुकता र जनचासो उल्लेखनीय रूपमा बढाएको बताइन्छ।
नेपाली पुरुष राष्ट्रिय टिमका कप्तान रोहित पौडेलको नेतृत्वमा रहेको लुम्बिनी लायन्सले यसपटक उपाधि जित्ने लक्ष्यसहित तयारी तीव्र पारेको छ।
एनपीएलको दोस्रो संस्करण आगामी मङ्सिर १ गतेदेखि सुरु हुँदैछ।
प्रतिक्रिया राख्नुहोस्