पहिरोले चन्द्रकोटको स्वास्थ्य चौकीमा क्षति

गुल्मी। गुल्मीमा आइतबारदेखि परेको अविरल वर्षाका कारण स्वास्थ्य चौकीमा क्षति पुगेको छ । जिल्लाको चन्द्रकोट गाउँपालिका वाड नम्बर-१ स्थित दिबु्रङ्ग स्वास्थ्य चौकीमा क्षति पुगेको हो ।

जिल्ला प्रहरी कार्यालय गुल्मीका सूचना अधिकारी गंगा बहादुर सारुका अनुसार गए राति ३ः३० को समयमा स्वास्थ्य चौकीभन्दा पछाडिबाट गएको पहिरोले गर्दा स्वास्थ्य चौकीको सुत्केरी स्याहार कक्ष पूर्ण रूपमा पुरिएको छ ।

जसले गर्दा सेवा प्रभावित बनेको छ । स्थानीय, स्वास्थ्यकर्मी, प्रहरी लगायतको सक्रियतामा पहिरो हटाउने काम भइरहेको र सुत्केरीको लागि स्वास्थ्य चौकीमै व्यवस्थापन गर्ने व्यवस्था गरेको वडाध्यक्ष घनश्याम खरेलले जानकारी दिनुभयो । त्यसै गरी वर्षाको कारण चन्द्रकोट गाउँपालिका वडा नम्बर ८ मा चार जनाको परिवार जोखिममा परेको छ ।

मजुवाका अमर बहादुर कुमालको ढुङ्गा माटोले बनेको दुई तले कच्ची घर जोखिममा परेपछि उहाँहरू छिमेकीको परिवारमा स्थानान्तरण भएको जिल्ला प्रहरी कार्यालय गुल्मीले जनाएको छ । घटनामा मानवीय क्षति भने भएको छैन ।