‘हिमशृङ्खलाको संरक्षणमा विश्व समुदायको ध्यान जानुपर्छ’
काठमाडौँ । नेपाल कम्युनिष्ट पार्टी (माओवादी केन्द्र) का नेता हितबहादुर तामाङले मानव सभ्यतासँग जोडिएका हिमशृङ्खलाले जलवायु परिवर्तनको असर भोगिरहेकाले मानव सभ्यता जोगाउन विश्व समुदायको ध्यान हिमशृङ्खला संरक्षणमा जानुपर्ने बताउनुभएको छ ।
अठारौँ गणतन्त्र दिवसका अवसरमा राष्ट्रिय समाचार समिति (रासस) ले आयोजना गरेको ‘पर्वतीय पर्यटन: हाम्रो शान, हाम्रो पहिचान’ विषयक तस्बिर प्रदर्शनीको आज अवलोकनपछि पूर्व संस्कृति, पर्यटन तथा नागरिक उड्डयन मन्त्रीसमेत रहनुभएका तामाङले नेपालका हिमालको महत्त्व, जलवायु परिवर्तनको असर र नेपालले पाउनुपर्ने क्षतिपूर्तिका बारेमा सरकार र सरोकार भएका निकायले विश्वको ध्यानाकर्षण गराउनुपर्नेमा जोड दिनुभयो ।
“जलवायु परिवर्तनका कारण हामीले क्षति बेहोर्नु परिरहेको छ, जलवायु परिवर्तनमा नेपालको नकारात्मक भूमिका छैन, विकसित मुलुकले बढीभन्दा बढी कार्बन उत्सर्जन गरिरहेका छन्, त्यसको मार हामीले खेप्नुपरेको छ”, पूर्वपर्यटनमन्त्री तामाङले भन्नुभयो, “हिमशृङ्खला पग्लने, हिमताल फुट्ने र त्यसबाट मानव जीवन प्रभावित हुने अवस्था देखिएको छ । हिमालको संरक्षण गर्न सिङ्गो विश्व एकताबद्ध हुनुपर्छ ।”
सांस्कृतिक तथा प्राकृतिक सम्पदाको दृष्टिकोणबाट नेपाल सम्पन्न मुलुक भए पनि यी सम्पादको सदुपयोगमा कमजोरी भइरहेको नेता तामाङले धारणा व्यक्त गर्नुभयो । “पर्यटन नेपालको समृद्धिका लागि महत्त्वपूर्ण आधार हो, यी सम्पदामार्फत नेपाललाई विश्वमञ्चमा चिनाउन, रोजगारी सिर्जना, वैदेशिक मुद्रा आर्जन गर्न सकिन्छ”, उहाँले भन्नुभयो ।
राससले आयोजना गरेको उक्त प्रदर्शनीले गणतन्त्रको महिमा र महत्त्व झल्काउने काम गरेको पूर्वपर्यटनमन्त्री तामाङले उल्लेख गर्नुभयो । प्राकृतिक सम्पदाको उचित प्रचारप्रसार गर्न नसक्दा यसबाट पर्याप्त लाभ लिन नसकिरहेको जनाउँदै उहाँले तस्बिर प्रदर्शनीले सम्भावनाको पुनः अध्ययन, यसको महत्त्व बुझ्न र भविष्यको योजना निर्माण गर्न महत्त्वपूर्ण भूमिका निर्वाह गर्ने बताउनुभयो ।
त्यसअघि राससका कार्यकारी अध्यक्ष धर्मेन्द्र झाले नेता तामाङलाई स्वागत गर्दै गणतन्त्र दिवसका अवसरमा आयोजना गरिएको प्रदर्शनीले नेपालका हिमालको महत्त्व र यसको सौन्दर्यताबारे उजागर गर्न मद्दत पुग्ने विश्वास व्यक्त गर्नुभयो । उहाँले नेपालमा केही छैन भन्ने भाष्यलाई चिर्न प्रदर्शनीमा राखिएका तस्बिरले सहयोग पुर्याउने उल्लेख गर्नुभयो ।
प्रतिक्रिया राख्नुहोस्