‘विश्व शान्तिका लागि प्रत्येक देशमा शान्ति हुनु जरुरी छ’

काठमाडौँ । उपप्रधानमन्त्री एवं सहरी विकासमन्त्री प्रकाशमान सिंहले विश्व शान्तिका लागि प्रत्येक देशमा शान्ति कायम हुनु जरुरी रहेको बताउनुभएको छ ।

ब्रह्मकुमारी राजयोग सेवा केन्द्रले आज यहाँ आयोजना गरेको ‘विश्व एकता र विश्वासका लागि ध्यान–योग’ छाता कार्यक्रमको राष्ट्रिय शुभारम्भ समारोहमा उहाँले कुनै पनि देशमा शान्ति कायम हुनुअघि त्यस देशका प्रत्येक नागरिकमा शान्तिको अनुभूति हुनुपर्नेमा जोड दिनुभयो । 

व्यक्ति, व्यक्तिमा शान्ति कायम गराउन केन्द्रले चलाएको ध्यान–योग छाता कार्यक्रमले सकारात्मक र महत्त्वपूर्ण भूमिका निर्वाह गर्ने उपप्रधानमन्त्री सिंहले विश्वास व्यक्त गर्नुभयो । केन्द्रले यसअघि पनि देशका विभिन्न स्थानमा शान्ति स्थापनाका लागि गरिरहेको आध्यात्मिक गतिविधिको उहाँले प्रशंसा गर्नुभयो । यो अभियानलाई धेरैभन्दा धेरै मानिसका बीचमा पु¥याउनुपर्नेमा उहाँले जोड दिनुभयो ।

केन्द्रका राजयोग प्रशिक्षक ब्रह्मकुमार रामसिंह ऐरले विश्वमा एकता र विश्वासका लागि ध्यान–योग छाता कार्यक्रम आवश्यक रहेको बताउनुभयो । व्यक्तिले स्वयंमा शान्तिको अनुभव गरेपछि विश्व शान्तिका लागि टेवा पुग्ने उहाँको भनाइ छ ।

भारतको माउन्ट आबुस्थित ब्रह्मकुमारी ईश्वरीय विश्वविद्यालयका सुनैना दिदीले ध्यान स्थलमा सकारात्मक ऊर्जा प्रवाह भई शान्तिका लागि सहयोग पुग्ने भएकाले ध्यान–योग छाता कार्यक्रमको शुभारम्भ नेपालमा गरिएको बताउनुभयो । केन्द्रकी राज योगिनी ब्रह्मकुमारी कुसुम दिदीले आज शुभारम्भ गरिएको कार्यक्रम देशका अन्य भागमा पनि विस्तार गरिने जानकारी दिनुभयो ।