मुख्यमन्त्री कप प्रदेश स्तरीय महिला भलिबल प्रतियोगिता– २०८१ को उपाधि पाल्पालाई 

दाङ । दाङको घोराहीमा भएको मुख्यमन्त्री कप प्रदेश स्तरीय महिला भलिबल प्रतियोगिता– २०८१ को उपाधि पाल्पाले जितेको छ । शनिबार सम्पन्न फाइनल खेलमा पाल्पाले रुपन्देहीलाई ३–२ को सेटमा हराउँदै उपाधि हात पारेको हो । 

प्रदेश खेलकुद परिषद्, लुम्बिनीको आयोजनामा फागुन २० गतेदेखि दाङको घोराही १५ सहिद मञ्चमा भएको प्रदेश स्तरीय प्रतियोगिता अन्तरगत उपाधि भिडन्तमा पहिलो सेट हारेको पाल्पाले त्यसपछि पुनरागमन गर्दै लगातार दुई सेट जित्दै बलियो प्रभाव देखायो । तर, चौथो सेटको खेल रुपन्देहीले फेरि जित्दै खेल २–२ सेटको बराबरीमा पुर्‍याएपछि फाइनल खेल थप रोमाञ्चक बन्न पुग्यो । पाँचौँ तथा अन्तिम सेटमा भने पाल्पाले थप सशक्त र प्रभावशाली खेल पस्कँदै नजिता आफ्नो पक्षमा पार्न सफल भयो ।

पाल्पाले समग्रमा १९–२५, २५–२१, २५–१७, २५–२० र १५–८ अङ्कका साथ उपाधि हात पारेको हो । उल्लेख्य दर्शकको उपस्थितिमा भएको फाइनल खेलमा पाँच सेटको खेलबाट नतिजा निस्किँदा खेलाडीले पनि आफ्नो खेल कौशल प्रस्तुत गरे

प्रतियोगिताको उपाधि जितेको पाल्पाले नगद एक लाखसहित शिल्ड, मेडल र प्रमाण–पत्र पुरस्कार पाएको छ । उपविजेता बनेको रुपन्देहीले नगद पैसट्टी हजार, शिल्ड, ट्रफी र प्रमाण–पत्र प्राप्त गरेको छ ।

प्रदेश स्तरीय लिग कम नकआउट प्रतियोगितामा दाङसहित लुम्बिनीका १२ वटै जिल्लाबाट महिला भलिबल खेलाडी सहभागी भएका प्रदेश खेलकुद परिषद्का सदस्य सचिव तिरन गौतमले जानकारी दिनुभयो । 

प्रतियोगितामा विजेता तथा उपविजेता टिमका खेलाडीलाई पुरस्कार तथा प्रमाण पत्र प्रदान कार्यक्रममा घोराही उपमहानगरपालिकाका नगर प्रमुख नरुलाल चौधरीले प्रदेश सरकारले खेलकुदको विकासका लागि गरिरहेको प्रयासले लुम्बिनीमा महिला भलिबलको खेलाडीको सम्भावना उजागर भएको बताउनुभयो ।