यातायात बन्द गरेर दाउन्ने सडकखण्ड मर्मत गरिने 

बर्दघाट । बुटवल नारायणगढ सडक खण्ड अन्तरगत दाउन्नेमा यातायात बन्द गरेर सडक विस्तारको काम अगाडि बढाइने भएको छ । 

अहिले दाउन्ने खण्डमा पहाड काट्ने, पर्खाल लगाउने र कल्भर्ट निमार्णको काम भइरहेकाले सवारी साधन जाममा पर्दा यात्रुले दुःख पाएको भन्दै प्रशासनले सवारी साधन सञ्चालनमा रोक लगाएर काम गर्न लागेको हो । 

धुलो र खाडलमा सवारी साधन बिग्रने तथा सडक विस्तारको क्रममा सवारी साधनलाई जोखिम हुने भएकाले चैत २७ गतेदेखि चैत ३१ गतेसम्म दिनको ११ बजेदेखि ३ बजेसम्म र २०८२ वैशाख १ गतेदेखि वैशाख १५ गतेसम्म रातीको ११ बजेदेखि बिहान ५ बजेसम्म अत्यावश्यक बाहेकका सबै सवारी सञ्चालनमा रोक लगाएर सडक मर्मत र सडक विस्तारको काम गरिने पश्चिम् नवलपरासीका सहायक प्रमुख जिल्ला अधिकारी पोषण भण्डारीले जानकारी दिनुभयो । 

दाउन्ने खण्डको १४ किलोमिटर पार गर्न अहिले ४ देखि ६ घण्टासम्म लाग्ने गरेको यात्रु तथा चालकहरूको गुनासो छ ।