हुलास स्टिलले नेपालमै पहिलोपटक रुपन्देहीमा खोल्यो सर्भिसिङ सेन्टर

रुपन्देही । पछिल्लो समयमा नेपालमा औद्योगिक वातावरण नभएको गुनासो बढिरहेकै समयमा नेपालको औद्योगिक घराना हुलास स्टील इण्डष्ट्रिज लि.ले रुपन्देहीको तिलोत्तमामा नेपालकै पहिलो सर्भिस सेन्टर सञ्चालनमा ल्याएको छ । 

जस्तापाता लगायत स्टिलजन्य वस्तुहरू उत्पादन गर्दै आएको हुलास उद्योगले तिलोत्तमा नगरपालिका–७ मंगलापुरमा तीन करोड लगानीमा सर्भिस सेन्टर सञ्चालनमा ल्याएको हो । सर्भिस सेन्टरमा हुलास स्टिलका एच स्पान र हुलास हेरिटेज सीट उत्पादन र विक्री वितरण हुने कम्पनीका चिफ फाइनान्स अफिसर सुनिल मनोत जैनले बताउनुभयो । सर्भिस सेन्टरबाट उपभोक्ताले चाहेको साइज र परिमाण ६ घण्टाभित्र डेलिभरी पाउने उहाँले दाबी गर्नुभयो । रुपन्देहीमा उत्पादन हुने एच स्पान र हुलास हेरिटेज सिटको मूल्य सिमरास्थित मुख्य उद्योगमा उत्पादन भएर आउने भन्दा सस्तो हुने र अर्डर गरेकै एकदिन पछि डेलिभरी पाइने भएकाले उपभोक्ता लाभान्वित हुने मनोतले बताउनुभयो । 

तीन दशकदेखि हुलास स्टिलको आधिकारिक विक्रेता रहेको भट्टराई हार्डवेयर एण्ड सप्लायर्ससंगको सहकार्यमा सञ्चालनमा आएको सर्भिस सेन्टरको बिहीबार तिलोत्तमा नगरपालिकाका प्रमुख रामकृष्ण खाँणले उद्घाटन गर्दै नेपालकै प्रतिष्ठित उद्योगले तिलोत्तमामा सर्भिस सेन्टर स्थापना गर्नुले यहाँ रोजगारी सिर्जना हुने, व्यवसाय चलायमान हुने र उपभोक्ता समेत लाभान्वित हुने बताउनुभयो । तिलोत्तमा उदाउँदो नगर भएकाले यहाँ उद्योग, कारखाना, पोल्ट्री फार्म र आवासीय घरहरू बन्ने क्रम बढ्दो दरमा रहेकाले सर्भिस सेन्टर दिगो रुपमा सञ्चालन हुने उहाँको भनाइ थियो ।

सर्भिस सेन्टर सञ्चालनमा आउँदा सिमराबाट बुटवलसम्म ढुवानी गर्दा हुने खर्च कटौती हुँदा उपभोक्ताले सस्तो मूल्यमा पाउने हुलासको स्थानीय अधिकृत विक्रेता हार्डवेयर एण्ड सप्लायर्सका सञ्चालक नारायण भट्टराईको कथन छ । उपभोक्ताले आफ्नो रोजाई र साइजमा ४ देखि ६ घण्टाभित्र डेलिभरी पाउने र डिलरहरूले धेरै स्टक राख्नुपर्ने झन्झटबाट मुक्त हुने छन्। चाहे अनुसारका ठूला साइजको एच स्पान र हेरिटेज सीट अन्य कर्कटपाताको तुलनामा १५ प्रतिशतसम्म सस्तो हुने भट्टराईको दाबी छ ।

हुलास स्टिलका प्रबन्धक हिमांशु गोल्छाले नेपालमै पहिलो पटक उद्योगले यो क्षेत्रबाट सेवा बिस्तार गरेपछि यस क्षेत्रका ग्राहकलाई सहज हुने बताउनुभयो । उहाँले यो क्षेत्रका व्यवसायीहरूलाई धेरै स्टक राख्नुपर्ने समस्या नहुने र यातायातको खर्चसमेत कम हुने भएकाले सजिलो हुने जनाउनुभयो । ’कम्पनीमा अहिले सहकार्य गरेका भट्टराईसँग ४० वर्षदेखि सहकार्य थियो, यो क्षेत्रमा बढ्दो मागलाई सहजता दिनका लागि यो सेवा सुरु गरिएको हो’ उहाँले भन्नुभयो ।