खुल्यो भद्रपुर–गलगलिया नाका

भद्रपुर, झापा । भारतले झापाको भद्रपुरसँग सीमा जोडिएको गलगलिया नाका निकासी–पैठारीका लागि पूर्ण रुपमा खुला गरेको छ । 

नाका खुला गरेको जानकारी आएको नेपाल भारत मैत्री संघका झापा अध्यक्ष प्रदीपमणि रेग्मीले जानकारी दिनुभयो ।

मेची खोलामा पक्की पुल बनेपछि नेपाल सरकारले भद्रपुर भन्सारलाई मालसामान आयात–निर्यात हुन सक्नेगरी स्तरोन्नति गरे पनि सीमा जोडिएको गलगलियाको क्षमता विस्तार नगरिँदा निकासी–पैठारी हुन सकेको थिएन ।

रेग्मीले भारत सरकारले गलगलिया भन्सार भएर आयात–निर्यात सहज बनाएको जानकारी दिनुभयो । अब भद्रपुर–गलगलिया नाकाबाट ऐन–कानूनले छुट दिएका सबै माल वस्तु आयात–निर्यात गर्न सकिने बताइएको छ ।

गलगलिया नाका विहार राज्यअन्तर्गत पर्ने भएकाले अझ सुविधा छ । मेची भन्सार पश्चिम बङ्गालमा पर्ने भएकाले मालसामानको जाँच परीक्षण गर्नु पर्दा कोलकाता पठाउनुपर्छ । तर, गलगलिया विहार राज्यमा पर्ने भएकाले जोगमनीबाटै परीक्षण हुने व्यवस्था भएकाले निकासी–पैठारी अत्यन्तै सहज हुने झापा उद्योग संघका अध्यक्ष यमबहादुर श्रेष्ठले बताउनुभयो । व्यवस्थित भन्सारका लागि समय केही लाग्ने भए पनि काम सुरु भइसकेको उहाँले बताउनुभयो ।