अछामका १० वटै पालिकामा विपद सम्बन्धी कृत्रिम घटना अभ्यास गर्दै नेपाली सेना

अछाम । नेपाली सेनाको अछाम जिल्ला स्थित गोरख बक्स गणले विपद जोखिम न्यूनीकरण सम्बन्धि कृत्रिम घटना अभ्यास अभियान सञ्चालन गरेको छ । यसैबीच आज जिल्लाको कमलबजार नगरपालिकामा विपद जोखिम न्यूनीकरण र प्रतिकार्य सम्बन्धी जनचेतनामूलक कार्यक्रम प्रस्तुतीकरण गरिएको छ । 

गोरख बक्स गण र कमलबजार नगरपालिकाको संयुक्त आयोजनामा भएको आजको कार्यक्रम कमलबजार नगरपालिकाका नगरप्रमुख यज्ञ प्रसाद ढकालको अध्यक्षतामा सम्पन्न भएको हो । अछाम जिल्लाका १० वटै स्थानीय तहमा अभियान सञ्चालन गर्ने उद्देश्यका साथ ढकारी गाउँपालिकाबाट शुभारम्भ गरिएको कृत्रिम घटना अभ्यास पञ्चदेवल विनायक नगरपालिका ,बान्निगढी जयगढ गाउँपालिका, मेल्लेख गाउँपालिका,चौर पाटी गाउँपालिका र तुर्माखाद गाउँपालिका गरि हालसम्म ६ वटा स्थानीय तहमा यस अघि गरिएको र आज कमलबजार नगरपालिकामा व्यापक जनसहभागितामा कार्यक्रम सम्पन्न भएको गोरख बक्स गण अछामका गणपति प्रमुख सेनानी संगम अधिकारी जानकारी दिनुभयो ।

गोरख बक्स बाट ४० जनाको टोलिले प्रत्येक पालिकामा ३ दिनको प्याकेज अन्तर्गत पहिलो दिन समन्वय गर्ने दोस्रो दिन स्थानीय जनप्रतिनिधि लगायत स्थानीय सरोकारवालाहरुलाई प्रशिक्षण गराउने र तेस्रो दिन विपद जोखिम न्यूनीकरण सम्बन्धि कृत्रिम घटना अभ्यास गर्ने गरिएको गणपति अधिकारीले बताउनुभयो ।

चैत मसान्तसम्म सम्म १० वटै पालिका हरुमा अभ्यास सम्पन्न गर्ने र आवश्यकता को आधारमा यो अभियान लाई निरन्तरता दिनुका साथै ग्रामीण बस्ती लाई प्राथमिकतामा राखेर यस पछिका कार्यक्रम सञ्चालन गर्ने योजना रहेको उहाँको भनाइ छ ।

धेरै जसो पालिका हरुको विपद व्यवस्थापन समितिमा विपद्को समयमा प्रयोग गरिने यन्त्र, उपकरण भएर पनि त्यसको प्रयोग तथा व्यवस्थापन नगरिएकोले विपद व्यवस्थापन समितिको टिमलाई  लाई आवश्यक तालिम ,प्रशिक्षण र तिनको व्यवस्थापनको बारेमा जानकारी गराइएको गोरख बक्स गणका सेनानी अमृत खड्काले बताउनु भयो ।

विद्यालय हरुमा पनि गएर विद्यार्थीहरूलाई नेपाली सेनाको इतिहासको बारेमा र बिपदमा नेपाली सेनाको भूमिकाको बारेमा जानकारी गराउने गरिएको खड्काको भनाइ छ ।

आज प्रदर्शन भएको कार्यक्रमको समापन गदै नगर प्रमुख यज्ञ प्रसाद ढकालले आगलागी भूकम्प बाढीपहिरो लगायतका विपदका घटना पूर्व अपनाउनुपर्ने सावधानी र घटना घटिसके पश्चात् गरिनुपर्ने खोज तथा उद्धारका कार्यमा कसरी कार्य गर्ने भन्ने विषयमा नागरिकता लाई सचेतना प्रदान गरेकोले नेपाली सेना लाई धन्यवाद व्यक्त गर्नु भयो ।

यस अघि तुर्माखाद गाउँपालिकामा कार्यक्रम सम्पन्न भएको थियो ।  तुर्माखाद गाउँपालिका अध्यक्ष डम्बर बिसीले भौगोलिक रूपमा सदरमुकाम बाट टाढा रहेको तुर्माखाद गाउँपालिकामै पुगेर बिपद सम्बन्धि कृत्रिम अभ्यास सञ्चालन गरि गाउँपालिका बासीलाई सचेतता जगाइ दिएकोमा नेपाली सेनालाई धन्यवाद दिनु भएको थियो । गाउँमै पुगेर नेपाली सेनाले विपद जोखिम न्यूनीकरण सम्बन्धि कृत्रिम घटना अभ्यास गरेको पहिलो पटक देखेको स्थानीयहरूले बताएका छन् । यो अभ्यास बाट आफू हरूलाई विपद पूर्व तयारी योजना बनाउन र बिपद जोखिम न्यूनीकरण गर्न सहयोग पुग्ने उनीहरूको भनाइ छ ।