त्रिभुवन अन्तर्राष्ट्रिय विमानस्थलमा सरसफाइकर्मीको आन्दोलन, फोहरका थुप्रोले यात्रु हैरान

काठमाडौँ ।  त्रिभुवन अन्तर्राष्ट्रिय विमानस्थलका सरसफाइकर्मी कर्मचारीहरू तलब नपाएको विरोधमा आन्दोलनमा उत्रिएका छन् ।

सरसफाइकर्मी कर्मचारीहरू आन्दोलनमा उत्रिएपछि अहिले विमानस्थलको (डोमेष्टिक) आन्तरिकतर्फ सरसफाई नगरिँदा फोहरको थुप्रो जम्मा भएको छ । तलब माग गर्दै विगत दश दिनदेखि आन्दोलनमा उत्रिएका सरसफाइकर्मी कर्मचारीहरूले आन्तरिकतर्फको कुनै पनि फोहर नउठाएको त्रिभुवन अन्तर्राष्ट्रिय विमानस्थलले जनाएको छ ।

सरसफाइकर्मी कर्मचारीले फोहर नउठाउँदा अहिले त्रिभुवन अन्तर्राष्ट्रिय विमानस्थलको आन्तरिकतर्फको क्षेत्रमा निकै दुर्गन्धित फैलिएको विमानस्थलमा भेटिनु भएका यात्रु हरिष क्षेत्रीले गुनासो गर्नुभयो ।

उहाँले भन्नुभयो, “अन्तर्राष्ट्रिय विमानस्थलको आन्तरिकतर्फ जता ततै फोहरको थुप्रो छ । कर्मचारी कालो ब्यानर टाँगेर आन्दोलनमा छन् । फोहरको गन्धले विमानस्थल वरपर बसी सक्नु छैन । काम गरेको पैसा त दिनु पर्छ नी ?”

उता त्रिभुवन अन्तर्राष्ट्रिय विमानस्थलका महाप्रबन्धक जगन्नाथ निरौलाले सरसफाइकर्मी कर्मचारीहरूको तलबका लागि नेपाल नागरिक उड्डयन प्राधिकरण स्थित सञ्चालक समितिमा पत्राचार भएपनि समितिले निकासा नदिएका कारण उहाँहरूको तलब दिन नसकिएको बताउनुभयो ।

उहाँले भन्नुभयो, “तलबका लागि प्राधिकरण सञ्चालक समितिमा पत्राचार गरिएको छ । समितिले तलब निकासाका लागि निर्णय सहितको पत्र नदिएका कारण कार्यालयले तलब दिन नसकेको हो । सरसफाइकर्मी कर्मचारीले विमानस्थलको फोहर उठाउने कार्य पुरै ठप्प पारेका छन् ।”