एमाले पर्साद्वारा वीरगञ्जमा शक्ति प्रदर्शन

वीरगञ्ज । नेकपा एमालेले गणतन्त्रको समर्थनमा तथा राजतन्त्रको विरोधमा आज वीरगञ्जमा बृहत् शक्ति प्रदर्शन गरेको छ । 

राजावादी गतिविधिहरूको विरोधमा खबरदारी गर्न आयोजित मोटरसाइकल जुलुसले वीरगञ्जका मुख्य सडकहरूमा एमालेको प्रभावशाली उपस्थिति देखाएको थियो ।

वीरगञ्जको पावर हाउस चोकबाट सुरु भएको मोटरसाइकल र्‍याली मुर्ली, घण्टाघर, रेल्वे रोड, छपकैया, आदर्शनगर र घडिअर्वा हुँदै पुनः घण्टाघर चोकमा पुगेर कोणसभामा परिणत भएको थियो । सभामा एमालेका नेताहरूले राजतन्त्र फर्काउने प्रयासविरुद्ध चेतावनी दिएका थिए ।

कोणसभालाई सम्बोधन गर्दै एमाले केन्द्रीय सदस्य तथा प्रतिनिधिसभा सांसद प्रभु हजराले पछिल्लो समय राजावादीहरू सक्रिय हुन थालेको भन्दै सडकमै शक्ति प्रदर्शन गर्नु परेको बताउनुभयो । 

एमाले केन्द्रीय कमिटी सल्लाहकार जालिम मियाँले पूर्व राजा र उनका समर्थकहरूलाई समयमै सचेत रहन चेतावनी दिँदै अझै समय छ, पूर्व राजा औकातमा बस नत्र नारायणहिटीबाट निर्मल निवाससम्म जनताले लखेटिसकेका छन् । अब फेरि त्यहाँबाट पनि अन्त लखेट्नुपर्ने दिन नआओस् भन्नुभयो ।

एमाले पर्साका अध्यक्ष डा. विश्वम्भर शर्माको अध्यक्षतामा सम्पन्न कोण सभालाई संविधानसभा सदस्य विचारी यादव सहितका नेताहरूले सम्बोधन गर्नुभएको थियो ।