लुम्बिनीका मुख्यमन्त्री आचार्यद्वारा रेडियो नेपालप्रति शुभकामना व्यक्त

दाङ । लुम्बिनी प्रदेशका मुख्यमन्त्री चेतनारायण आचार्यले रेडियो नेपालको ७५औँ वार्षिकोत्सव (हीरक महोत्सव) को अवसरमा शुभकामना व्यक्त गर्नुभएको छ ।

उहाँले रेडियो नेपालले सामाजिक तथा सांस्कृतिक रुपान्तरण तथा परिवर्तनका लागि महत्त्वपूर्ण योगदान पुर्‍याएको बताउनुभयो । विविध कला, संस्कृति, साहित्य, गीत/संगीत, सामाजिक र सांस्कृतिक रुपान्तरणमा रेडियो नेपालले महत्त्वपूर्ण योगदान पुर्‍याएको बताउनु भएको हो ।

रेडियो नेपाल र नेपाल टेलिभिजनलाई सार्वजनिक सेवा प्रसारण नेपालमार्फत सञ्चालन हुनु महत्त्वपूर्ण उपलब्धि भएको बताउँदै उहाँले अब रेडियो नेपालले परिवर्तित समयसँगै आफ्ना प्रसारण सेवालाई थप परिष्कृत गर्न जरुरी रहेको बताउनु भयो । नागरिक केन्द्रित विपद् व्यवस्थापन, नागरिक जागरण, जनचेतना अभिवृद्धि लगायतका क्षेत्रमा रेडियो नेपालको योगदानको खाँचो अझै रहेको उहाँले उल्लेख गर्नुभयो ।