गण्डकी प्रदेशका ८ जिल्लामा खेलकुद गण्डकी विकास समितिका पदाधिकारी नियुक्त

पोखरा । गण्डकी प्रदेशका ८ जिल्लामा जिल्ला खेलकुद विकास समितिका पदाधिकारी नियुक्त हुनु भएको छ । गण्डकी प्रदेशका जिल्ला खेलकुद विकास समितिहरू गत फागुन ९ गते रिक्त भएसँगै प्रदेश खेलकुद परिषद्का अध्यक्ष एवं सामाजिक विकास, युवा तथा खेलकुद मन्त्री बिनदु कुमार थापाले ११ जिल्ला मध्य ८ जिल्लाका पदाधिकारी हालै नियुक्त गर्नु भएको हो ।

प्रदेश खेलकुद विकास नियमावली २०७८ को क,ख,ग र घ को क्रमशः अध्यक्ष, उपाध्यक्ष र सचिवको प्रदेश खेलकुद परिषद्को अध्यक्षको हैसियतले मन्त्री थापाले समितिको पदाधिकारी मनोनयन गर्नु भएको हो।

प्रदेश सरकार नेतृत्व गरेको नेपाली काँग्रेसले ६ जिल्लामा अध्यक्ष सहित कोषाध्यक्ष र सरकारमा सहकार्यको भूमिकामा रहेको नेकपा एमालेले ५ जिल्लामा अध्यक्ष र कोषाध्यक्ष पाउने गरी गरिएको सहमति बमोजिम पदाधिकारीहरू मनोनयन गरिएको परिषद्ले जनाएको छ । काँग्रेसको भागमा कास्की सहित गोर्खा, स्याङजा, बागलुङ, म्याग्दी र मनाङ परेको हो । अन्य जिल्लामा भने सरकारसँग सहकार्य गरेको नेकपा एमालेको भागमा नवलपुर, मुस्ताङ, लमजुङ, तनहुँ र पर्वत परेको हो । 

यसैबिच, प्रदेश खेलकुद परिषद् गण्डकीको सभाकक्षमा आयोजक एक कार्यक्रममा परिषद्का अध्यक्ष एवं गण्डकी प्रदेश सरकारका सामाजिक विकास, युवा तथा खेलकुद मन्त्री विन्दु कुमार थापाको रोहबरमा परिषद्का सदस्य सचिव श्रीधर शर्माले सपथ ग्रहण गराउनु भएको हो । उपाध्यक्ष र सदस्यहरूलाई भने मन्त्रीले सपथ ग्रहण गराउनु भएको हो ।

काँग्रेसले ६ जिल्लामा अध्यक्ष सहित कोषाध्यक्ष र सरकारमा सहकार्यको भूमिकामा रहेको नेकपा एमालेले ५ जिल्लामा अध्यक्ष र कोषाध्यक्ष पाउने गरी गरिएको सहमति बमोजिम पदाधिकारीहरू मनोनयन गरिएको हो । नेपाली काँग्रेसले ५ जिल्लामा उपाध्यक्ष र सचिव तथा नेकपा एमालेले ६ जिल्लामा उपाध्यक्ष र सचिव सहित पदाधिकारी मनोनयन गरिएको परिषद्का अध्यक्ष एवं मन्त्री थापाले बताउनु भयो ।

जिल्ला खेलकुद विकास समिति गोर्खाको अध्यक्षमा प्रेम बहादुर तामाङ, उपाध्यक्षमा मकेश बानियाँ, सचिवमा अमृता गुरुङ र कोषाध्यक्षमा होम बहादुर थापा मगर नियुक्त हुनु भएको हो । त्यसै गरी लमजुङको अध्यक्षमा सुमन श्रेष्ठ, उपाध्यक्ष अमृता पौडेल, सचिवमा मिन प्रसाद घले र कोषाध्यक्षमा रवि थापा, तनहुँको अध्यक्षमा अनिल पाण्डे (पुनः दोहोरिएको), उपाध्यक्षमा इनकन पोख्रेल खनाल, सचिवमा विश्व कुमार बुढा र कोषाध्यक्षमा कविराज श्रेष्ठ, कास्कीको अध्यक्षमा मिलन गुरुङ, उपाध्यक्षमा तिलक अधिकारी क्षेत्री, सचिवमा अन्जु केसी र कोषाध्यक्षमा विग्नेश थापा नियुक्त हुनु भएको हो ।

त्यस्तै स्याङ्जाको जिल्ला खेलकुद विकास समितिको अध्यक्षमा प्रकाश रेग्मी (पुनः दोहोरिएको), उपाध्यक्षमा विजय विक्रम खाँड, सचिवमा विद्यादेवी भट्टराई र कोषाध्यक्षमा धिरज खाँड, पर्वतको अध्यक्षमा जङ्ग बहादुर पुन मगर, उपाध्यक्षमा राजन गुरुङ, सचिवमा सपना पुर्जा पुन मगर र कोषाध्यक्षमा जगत प्रसाद लामिछाने, बागलुङको अध्यक्षमा (निर्णय हुन बाँकी), उपाध्यक्षमा कल्पना श्रेष्ठ र सचिवमा किशोर थापा, कोषाध्यक्ष (मनोनयन हुन बाँकी) रहेको छ भने म्याग्दी–अध्यक्षमा सुमन श्रेष्ठ, उपाध्यक्षमा विष्णु कुमार रोक्का, सचिवमा कुमार किशान र कोषाध्यक्षमा नरेश पुन नियुक्त हुनु भएको हो । नवलपुर–निर्णय हुन बाँकी रहेको । नवलपुरको कोषाध्यक्ष कोषराज कार्कीलाई गत साउन १० गतेको निर्णयले ४ वर्षको लागि नियुक्त गरेको थियो ।