प्रतिनिधिसभा बैठक: सूचना टाँसेर बैठक स्थगित भएको जानकारी

काठमाडौँ । प्रतिनिधिसभाको आजको बैठक दोस्रो पटक सूचना टाँसेर ४ बजे पुनः बस्ने गरी स्थगित गरिएको छ ।  

बिहान ११ बजेका लागि बोलाइएको बैठक ढिला गरि सुरु भए पनि प्रतिपक्ष दलका सांसदहरुले उठेर विरोध जनाएपछि  स्थगित गरिएको थियो । 

सभामुख देवराज घिमिरेले १५ मिनेटका लागि स्थगित गर्नुभएको बैठक दोस्रो पटक पनि सुरु हुन नसकेपछि सूचना टाँस गरी स्थगित गरिएको संसद् सचिवालयले जनाएको छ । 

सदन सुचारु गर्ने विषयमा सभामुख घिमिरे राजनीतिक दलका प्रमुख सचेतकहरूसँग छलफल गरिरहनुभएको छ ।

सरकारले नेपाल विद्युत् प्राधिकरणका कार्यकारी निर्देशक कुलमान घिसिङलाई हटाएको विषयमा प्रतिपक्ष दलका सांसदहरुले प्रधानमन्त्रीले सदनमा आएर जवाफ नदिएसम्म संसद्को बैठक चल्न नदिने  अडान लिँदै आएका छन् ।