‘नेता कार्यकर्ताले पार्टी सम्हाल्ने जिम्मेवारी फेरी मलाई दिनुभयो’

भक्तपुर । नेपाल मजदुर किसान पार्टीको आठौँ महाधिवेशनबाट पुन निर्वाचित पार्टी अध्यक्ष नारायणमान बिजुक्छे(रोहित)ले पार्टीका नेता कार्यकर्ताले पार्टी सम्हाल्ने जिम्मेवारी पुनः आफूलाई दिएको बताउनुभएको छ । 

महाधिवेशन सम्पन्न पछि आज सञ्चार कर्मीहरूसँग कुरा गर्दै अध्यक्ष बिजुक्छेले जहिलेसम्म सकिन्छ त्यही बेलासम्म निःस्वार्थ भावनाले देश र जनताप्रति समर्पित भएर देश र जनताको सेवा  गर्ने बताउनुभयो ।

उहाँले जनतालाई राजनीतिक रूपले सचेत पार्ने र देशको सेवामा पार्टीलाई भन्दा देश र जनताको हितका लागि काम गर्ने बताउनुभयो ।

नेपकिपाले बिजुक्छेको अध्यक्षतामा ३३ सदस्यीय केन्द्रीय कार्यसमिति सर्वसम्मत चयन गरेको छ । 

पार्टी स्थापनाकालदेखि अध्यक्ष हुँदै आउनुभएका ८५ वर्षीय बिजुक्छेलाई आठौँ महाधिवेशनले पुनः अध्यक्षमा निर्विरोध चयन गरेको हो । महाधिवेशनले पार्टीको केन्द्रीय सचिवमा प्रेम सुवाल र कोषाध्यक्ष मोहनप्रसाद प्रजापतिसहित केन्द्रीय सदस्यहरूलाई सर्वसम्मत चयन गरेको छ । 

त्यस्तै महाधिवेशनले सात प्रदेशमा सात जना संयोजकहरूसहित प्रदेश कार्यसमिति समेत सर्वसम्मत चयन गरेको छ ।