मधेशी समुदाय एचपिभी खोपप्रति उत्साहित

बाँके । मधेशी समुदायको ठुलो जनसङ्ख्या रहेको बाँकेको नरैनापुरमा मधेशी समुदायका किशोरीहरू पाठेघरको मुखको क्यान्सर बनाउने ह्युमन प्यापिलो भाइरस (एचपिभी) विरुद्धको खोप प्रति उत्साहित देखिएका छन् । 

यसअघि सञ्चालन गरिएका विभिन्न खोप अभियानमा सहभागी नहुने मधेशी समुदायका किशोरीहरू एचपिभी खोप लगाउन उत्साहित देखिएको युनिसेफका एसबिसी अधिकृत गाजी मोहम्मद मसूदले बताउनुभयो । 

उहाँले भन्नुभयो, “किशोरीहरूलाई खोप लगाउन समुदाय स्तरमा सचेतना मूलक कार्यक्रम गरेकोले पनि मधेशी बाहुल्य क्षेत्र नरैनापुरमा पाठेघरको मुखको क्यान्सरविरुद्धको एचपिभी खोप लगाउन किशोरीहरू आएका छन् ।” 

नरैनापुर गाउँपालिकाका अध्यक्ष सैयद इश्तियाक अहमद शाहले कक्षा ६ देखि १० सम्म छात्रालाई र विद्यालय नजाने १० देखि १४ वर्ष उमेर समूहका किशोरीहरूलाई लक्षित गर्दै एचपिभी विरुद्धको खोप अभियान सञ्चालन गरेकोले सम्बन्धित खोप केन्द्रमा गएर खोप लगाउन अपिल गर्नुभयो । 

नरैनापुरको गाउँ गाँउमा पुगेर युनिसेफका प्रतिनिधि साजना कुवरले एचपिभी खोप लगाएपछि सुई लगाएको ठाउँमा दुख्ने, सुन्निने, रातो हुने, ज्वरो आउने, टाउको दुख्ने, रिँगटा लाग्ने, मांसपेशी दुख्ने, थकाई लाग्ने पेट दुख्ने, वाकवाकी लाग्ने वान्ता हुने जस्ता प्रतिकुल असर देखिएपछि यस प्रकारका असर आफै ठिक हुँदै जाने हुँदा नआत्तिन किशोरीहरूसँग आग्रह गर्नु भएको थियो । 

दोस्रो चरणमा सुरु भएको एचपिभी खोप अभियानको पहिलो दिनमा नै नरैनापुरमा लक्षित समूहका २५ प्रतिशत किशोरीलाई खोप लगाइसकिएको नरैनापुरका स्वास्थ्य संयोजक नगेन्द्र कुमार शाहले जानकारी दिनु भयो ।