‘अन्तरजातीय विवाह सम्बन्धी उठेका विषय र चासोका सम्बन्धमा आफू गम्भीर र संवेदनशील’

काठमाडौँ । गृहमन्त्री रमेश लेखकले सर्लाहीमा भएको अन्तरजातीय विवाह सम्बन्धी उठेका विषय र चासोका सम्बन्धमा आफू गम्भीर र संवेदनशील भएको बताउनुभएको छ  ।

प्रतिनिधिसभाको आजको बैठकको आकस्मिक र शून्य समयमा सांसदहरुले उठाएका प्रश्नहरूको जवाफ दिँदै गृहमन्त्री लेखकले संविधानले व्यवस्था गरेको छुवाछुत तथा भेदभाव विरुद्धको हक एवं व्यक्तिका नैसर्गिक अधिकारको उपभोग गर्न पाउने वातावरण निर्माण गर्ने विषयमा सरकार क्रियाशील रहेको जानकारी गराउनुभयो ।

गृहमन्त्री लेखकले कुनै पनि प्रकारको जातीय विभेद र छुवाछुतको विरुद्धमा आफु सधैँ प्रतिबद्ध रहने बताउनुभयो ।

समाचारमा आएजस्तो गृहमन्त्रीको निर्देशनमा अत्याचार भयो भन्नु सरासर कपोकल्पित र असत्य भएको स्पष्ट पादै गृहमन्त्री लेखकले अन्तरजातीय विवाहलाई कानुनले नै मान्यता दिएको र त्यसको कार्यान्वयनका लागि गृह मन्त्रालय लागिरहेको पनि बताउनुभयो ।

गृहमन्त्री लेखकले पीडितको सम्पूर्ण तथ्य सार्वजनिक भइसकेको र कुनै त्रुटि भएको देखिए दोषीलाई कानुन बमोजिम कारबाही गर्ने र पीडितहरूको संरक्षण गर्न मन्त्रालय प्रतिबद्ध रहेको पनि सदनलाई जानकारी गराउनुभयो ।