जिल्ला स्तरीय भलिबलको उपाधि मेलम्ची–७ दुवाचौरलाई

सिन्धुपाल्चोक । सिन्धु योङ स्टार युवा क्लबको आयोजना भएको भलिबल जिल्ला स्तरीय भलिबल प्रतियोगिताको उपाधि मेलम्ची–७ दुवाचौरले जितेको छ ।

आज सम्पन्न फाइनल खेलमा आयोजक सिन्धु योङ स्टारलाई २–० को सेटमा पराजित गर्दै मेलम्ची –७ ले उपाधिसहित १ लाख नगद शिल्ड, मेडल र ट्रफी प्राप्त गरेको छ । दोस्रो भएको आयोजकले ६५ हजारमा चित्त बुझाएको छ ।

त्यस्तै जुगल गाउँपालिकालाई पराजित गर्दै सृजनशील युवा क्लब मेलम्ची–७ ले तेस्रो स्थानसहित नगद ३५ हजार र शिल्ड मेडल प्राप्त गरेको आयोजक क्लबका सुनबहादुर घलेले जानकारी दिनुभयो ।

विजेताहरूलाई प्रमुख अतिथि मेलम्ची नगरपालिकाका प्रमुख आइतमान तामाङ, वडाध्यक्ष किरणदिप खडका लगायतले पुरस्कार प्रदान गर्नुभयो । जनता माध्यमिक विद्यालय मेलम्ची –९को खेलकुद मैदानमा प्रतियोगिता आयोजना गरिएको थियो ।