अछाममा दुई किशोरी जङगलमा मृत अवस्थामा भेटिए

अछाम । अछाममा दुई किशोरी जंगलमा मृत अवस्थामा भेटिएका छन् । एकैघरका फुपू–भदै जंगलमा मृत अवस्थामा भेटिएका हुन । मृतकहरु जिल्लाको ढकारी गाउँपालिका– ८ घोडासैनस्थित पल्साँताकी १५ वर्षीया सरस्वती खड्का र १४ वर्षीया ईश्वरा खड्का रहेका छन् ।
गत शुक्रबार बाख्रा चराउन जंगल गएका उनीहरू गाउँपालिकाकै वडा नम्बर १ शोडषा सामुदायिक वनको चिन्ने ओढारस्थित एघारेभिरमा मृत भेटिएको जिल्ला प्रहरी कार्यालय अछामका प्रमुख प्रहरी नायब उपरीक्षक ईश्वरीप्रसाद भण्डारीले जानकारी दिनुभयो ।

श्री विद्याप्रबोधनी मावि घोडासैनमा कक्षा आठमा अध्ययनरत उनीहरू गोठालो गएको दिन घर नफर्किएपछि स्थानीयले खोजतलासका क्रममा हिजो साँझ ५ बजेतिर एघारेभिरको छेउमा १० मिटरको दूरीमा उनीहरूको शव भेटाएपछि प्रहरीलाई खबर गरेको स्थानीय रामबहादुर भण्डारीले बताउनुभयो ।

आज बिहानै घटनास्थल पुगेको प्रमुख जिल्ला अधिकारी शिवप्रसाद लम्साल र प्रहरी नायब उपरीक्षक भण्डारी सहितको टोलीले घटनाको अनुसन्धान थालेको छ । प्रारम्भिक अनुसन्धान अनुसार उनीहरू दुवैजना भिरबाट खसेको हुन सक्ने अनुमान गरिएको भण्डारीले बताउनुभयो ।

यद्यपि, घटनाको अनुसन्धान भइरहेको उहाँको भनाइ छ । अनुसन्धानका लागि कोहलपुरबाट ल्याइएको कुकुर पनि घटनास्थलमा परिचालन गरिएको छ । अहिले मृतक दुवैजनाको शवको मुचुल्का भइरहेको र पोस्टमार्टमका लागि सदरमुकाम मंगलसेन लैजाने तयारी भइरहेको छ ।