जगदुल्ला ठेक्का प्रकरणमा ऊर्जा मन्त्रीको संलग्नता नरहेको स्पष्टोक्ति

काठमाडौँ । जगदुल्ला जलविद्युत आयोजनाको ठेक्का प्रकरणमा ऊर्जा, जलस्रोत तथा सिंचाईमन्त्री दिपक खड्काको कुनै संलग्नता नरहेको सचिवालयले जनाएको छ ।

उर्जामन्त्री खड्काका स्वकीय उपसचिव भुपालमान बस्नेतले आज एक विज्ञप्ति जारी गरी डोल्पा जिल्लामा निर्माणाधीन जगदुल्ला अर्ध जलाशययुक्त आयोजना (१०६ मेगावाट) को निर्माण कार्यको ठेक्का आह्वानको विषयलाई लिएर केही सञ्चार माध्यमले  उर्जामन्त्री खड्कालाई जोडेर प्रकाशित समाचारप्रति गम्भीर ध्यानाकर्षण भएको बताइएको छ ।

“जगदुल्ला हाइड्रोपावर कम्पनी लिमिटेडको छुट्टै सञ्चालक समिति हुने भएकोले उक्त सञ्चालक समितिमा मन्त्री संलग्न हुने कुनै कानूनी व्यवस्था छैन, आफूसँग नजोडिएको विषयलाई लिएर विभिन्न सञ्चार माध्यमले प्रकाशन गरेको कपोलकल्पित एवं भ्रामक समाचारप्रति हाम्रो गम्भीर आपत्ति रहेको छ,”– स्वकीय उपसचिव बस्नेतद्वारा जारी विज्ञप्तिमा भनिएको छ ।

प्रकाशित समाचार सामाग्रीमा न्यूनतम सत्यतथ्य समेत एकीन नगरी समाचार प्रकाशन गरेको र  समाचार प्रकाशन गर्नुपूर्व अपनाउनुपर्ने सचेतना एवम् पत्रकारिताको मर्म र आचारसंहिता समेतको ख्याल नगरेको बताइएको छ । माननीय मन्त्रीजस्तो सामाजिक मर्यादामा रहने सार्वजनिक ओहोदामा रहेको व्यक्तिको सम्बन्धमा समाचार सम्प्रेषण गर्दा तथ्य यकिन गर्ने खोजपूर्ण र प्रमाणमा आधारित प्रक्रिया समेत अपनाएको नपाइएको विज्ञप्तिमा उल्लेख छ ।

“प्रकाशित समाचारका सम्बन्धमा सम्बन्धित जगदुल्ला हाइड्रोपावर कम्पनी लिमिटेडले समेत प्रेस विज्ञप्ति जारी गरी प्रकाशित समाचार सामाग्री कपोलकल्पित, भ्रामक एवम् तथ्यहीन भएको स्पष्ट पारिसकेको अवस्था छ । यसरी तथ्यहीन समाचार सामाग्री प्रकाशन गर्दा माननीय मन्त्रीजस्तो सामाजिक सार्वजनिक ओहोदामा आसीन व्यक्तिको राजनीतिक एवम् सामाजिक चरित्रमा दाग लाग्ने एवं शारीरिक एवम् मानसिक क्षति हुने हुन्छ । यसको शोध भर्ना कहीँ कतैबाट हुनै सक्दैन,”– विज्ञप्तिमा उल्लेख छ ।

यस्तो गम्भीर विषयमा राष्ट्रको चौँथो अङ्गका रुपमा रहेको सञ्चार माध्यमले यस्तो गम्भीर लापरबाही गर्नु शोभनीय नहुने बताइएको छ । सम्बन्धित कम्पनीले जारी गरेको विज्ञप्तिमा माननीय मन्त्रीज्यूको कुनैपनि प्रकारको संलग्नता नभएको बताइसकेको छ । यस्तो सन्दर्भमा यस विषयलाई थप जालझेलको विषय नबनाउन र आफ्नो स्वार्थको रोटी सेक्ने काम नगर्नुहुन आम सञ्चार माध्यमलाई उहाँले आग्रह गर्नुभएको छ ।

मन्त्री र मन्त्रालयजस्तो गरिमामय संस्थाको विना आधार धज्जी उडाउने कार्यले किमार्थ कसैको हित हुन नसक्ने भन्दै उहाँले प्रकाशित समाचारको धरातल तथ्यविहीन भएको सन्दर्भमा उक्त सामाग्री हटाएर खण्डन प्रकाशित गर्नसमेत सञ्चार माध्यमालाई अपिल गर्नुभएको छ ।