कृषि क्षेत्रमा इजरायली सहयोगलाई निरन्तरता दिन कृषिमन्त्री अधिकारीको आग्रह

काठमाडौँ । कृषि तथा पशुपन्छी विकास मन्त्री रामनाथ अधिकारीले नेपालको  कृषि क्षेत्रमा इजरायलले गर्दे आएको सहयोग आगामी दिनमा पनि निरन्तर रहने अपेक्षा व्यक्त गर्नुभएको  छ  ।  

आज सिहंदरवार स्थित मन्त्रालयमा नेपालका लागि इजरायलका राजदूत स्मुलिक बास सँग भएको शिष्टाचार भेटवार्तामा मन्त्री अधिकारीले नेपाल र इजरायल  वीच ६५ वर्ष देखिको मैत्रीपूर्ण सम्बन्ध रहिआएको उल्लेख गर्दे दुई मुलुकबिच भएको कृषि क्षेत्रमा सहकार्य सम्बन्धी सम्झौता नवीकरणका लागि पहल गर्न राजदूत समक्ष आग्रह गर्नुभयो ।

 मन्त्री अधिकारीले नेपाल र इजरायल वीच सम्झौता भई कार्यान्वयनमा आएको ‘कमाऊ र सिक’ कार्यक्रमले नेपाली युवाहरूलाई अवसर सृजना गरेको भन्दै यसलाई पुनः निरन्तरता दिन आग्रह गर्नुभयो । इजरायलले  नेपाली विद्यार्थीहरूलाई उपलब्ध गराउँदै आएको  छात्रवृत्तिले  नेपालको  कृषि क्षेत्रमा महत्त्वपूर्ण सहयोग पुगेको  भन्दै  मन्त्री अधिकारीले नेपालको कृषिको  विकासका लागि इजरायल सरकार सँग भएको सम्झौता अनुरुप  सेन्टर फर एक्सीलेन्स स्थापनाका लागि क्षेत्रहरूको छनौट भइसकेकाले सेन्टर स्थापनाका लागि पहल गर्न राजदूत समक्ष आग्रह गर्नुभयो । करिब ५ हजार नेपालीहरू हाल इजरायलमा कार्यरत रहेको  र यसबाट उनीहरूको जीवनस्तरमा समेत सुधार आएको भन्दै मन्त्री अधिकारीले आगामी दिनमा देश र जनताको  पारस्परिक हितका लागि बहुपक्षीय सहयोग जारी रहने अपेक्षा व्यक्त गर्नुभयो  ।  

त्यस क्रममा राजदूत बासले इजरायलले नेपालको कृषि क्षेत्रमा प्रविधि हस्तान्तरण मार्फत आगामी दिनमा थप सहकार्य गर्न चाहेको बताउनुभयो । राजदूत वासले यसै वर्ष नेपालले छनौट गरेका क्षेत्रमा  कृषिका लागि सेन्टर फर एक्सीलेन्स स्थापनाका लागि पहल गर्ने प्रतिबद्धता व्यक्त गर्नुभयो ।

कृषि क्षेत्रमा नेपाली कामदार लैजान सकिने सम्भावना रहेको भन्दै राजदूत बासले कृषि क्षेत्रको विकासका लागि विगतमा दुई देश वीच भएका सहमतिहरूको कार्यान्वयनमा आफूले  ध्यान दिने पनि राजदूत बासले  बताउनुभयो।