स्कुटर दुर्घटनामा बाबु छोरीको मृत्यु

बर्दिया । बर्दियाको गुलरियामा स्कुटर दुर्घटनामा परि बाबु छोरीको मृत्यु भएको छ ।

गुलरिया नगरपालिका–६ पुरा ट्राफिक कार्यालय नजिक हुलाकी सडकमा रोकी राखेको ट्याक्टरमा ठोकिँदा उनीहरूको मृत्यु भएको हो । 

दुर्घटनामा गुलरिया नगरपालिका–६ बस्ने ३७ वर्षीय रामकुमार साह र उनकी ६ वर्षीय छोरी विद्या साहको मृत्यु भएको छ । स्कुटरमा सवार मृतक रामकुमारकी श्रीमती रुबी साह र उनका २ वर्षका छोरा प्रिन्स साह घाइते भएका छन् । 

मृतक रामकुमारले चलाइरहेको बा६८प ७०३६ नम्बरको स्कुटर म१त १०६२ नम्बरको रोकिराखेको ट्याक्टरमा पछाडिबाट ठोकिएको थियो । घाइते दुवै जनाको बर्दिया अस्पतालमा उपचार भइरहेको प्रहरीले जनाएको छ । 

स्कुटर, ट्याक्टर र ट्याक्टर चालक ३२ वर्षीय राकेश चौधरीलाई नियन्त्रणमा लिई जिल्ला प्रहरी कार्यालय बर्दियामा राखिएको जिल्ला प्रहरी कार्यालय बर्दियाका प्रहरी नायव उपरीक्षक ऋषिराम घर्तिमगरले बताउनुभयो ।