राजनीतिक अस्थिरताका कारण विकासमा समस्या सिर्जना भयो : महासचिव पोखरेल 

दाङ । नेकपा एमालेका महासचिव शङ्कर पोखरेलले देश बलियो बनाउनका लागि बलियो शक्तिको आवश्यकता रहेको बताउनुभएको छ । 

तुलसीपुर उपमहानगरपालिका वडा न १९ को प्रशासनिक भवनको आज उद्घाटन गर्नुहुँदै महासचिव पोखरेलले विगतभन्दा वर्तमान धेरै उपलब्धि प्राप्त भएको बताउनुभयो । 

उहाँले जनतामा निराशाको खेती गर्नेहरूका कारण समाजमा अराजकता बढेको बताउनुभयो । महासचिव पोखरेलले राजनीतिक अस्थिरताका कारण विकासमा समस्या सिर्जना भएको बताउनुभयो । 

कार्यक्रममा तुलसीपुर उपमहानगरपालिकाका नगरप्रमुख टीकाराम खड्काले पालिकाका अब १९ वटै वडाले आफ्नै भवनबाट सेवा प्रारम्भ गरेको बताउनुभयो । 

उहाँले यसै महिनामा कृषि, पशु शाखा, वडा र स्वास्थ्य संस्थाले आफ्नै भवनबाट सेवा सुरु गरेको बताउनुभयो । नगरप्रमुख खड्काले वडाको प्रशासनिक कार्यालयसम्म आउने सडकलाई कालोपत्रे सुरुवात गरिने पनि जानकारी दिनुभयो ।

तुलसीपुर उपमहानगरपालिका वडा न १९ का वडाध्यक्ष प्रेमनाथ योगीले घोराही आँखा अस्पताल र बिजौरी छिल्लीकोट सडक खण्डकै नजिकमा सबै वडावासीको मध्यबिन्दुमा वडा कार्यालय भवन निर्माण गरिएको बताउनुभयो ।