बस दुर्घटना: २२ जना घाइते, चालक नियन्त्रणमा

मकवानपुर। मकवानपुरको बकैयामा बस दुर्घटना हुँदा कम्तीमा २२ जना यात्रु घाइते भएका छन् ।

बुधबार बिहान साढे १० बजे बकैया गाउँपालिका-५ स्थित धरान-चतरा सडक खण्डमा बस दुर्घटनाग्रस्त भएको थियो। हेटौडाबाट चितवन तर्फ जाँदै गरेको बा ५ ख ६६५३ नम्बरको बस अनियन्त्रित भई सडकबाट करिब ५० मिटर तल खोल्सामा खसेको जिल्ला प्रहरी कार्यालय मकवानपुरका प्रवक्ता श्यामु अर्यालले जानकारी दिनुभएको छ । 

घटनापछि स्थानीय बासिन्दा र प्रहरीले संयुक्त रूपमा दुर्घटनामा फसेका यात्रुहरूलाई उद्धार गरेका थिए ।  घाइतेहरूलाई हेटौडा सहकारी अस्पतालमा उपचारका लागि पठाइएको प्रवक्ता अर्यालले जानकारी दिनुभयो । 

प्रहरी टोलीले बसका चालक टिकाराम लामालाई नियन्त्रणमा लिएको छ। चालकको प्रारम्भिक बयान अनुसार बसमा कुल ३७ जना यात्रु सवार रहेका थिए। हाल सबै घाइतेहरूको अवस्था  सामान्य रहेको प्रहरीले जनाएको छ।