रामग्रामले नेपालकै दोस्रो ९० फिट अग्लो शिवको मूर्ति बनाउँदै

नवलपरासी पश्चिम् । रामग्राम नगरपालिकाले नवलपरासीको सदरमुकाम परासी स्थित झरही खोला किनारमा ९० फिट अग्लो शिवको मूर्ति निर्माण गर्ने भएको छ । रामग्राम २ हाटबजारको अन्तिम भागमा निर्माण हुने शिवको मूर्ति निर्माण कार्यको सोमवार नगर प्रमुख धनपत यादवले शिलान्यास गर्नुभएको छ। नगर योजना अन्तर्गत पहिलो चरणमा मूर्ति निर्माण कार्य सुरु भएको हो ।

अनन्त कन्स्ट्रक्सन प्रा.लीले ३३ लाख बराबरको लागतमा पहिलो चरणको मूर्ति निर्माण कार्य थालेको हो । पर्यटकीय तथा धार्मिक स्थलको रुपमा विकास गर्ने लक्ष्य अनुरुप काम थालिएको वडा नम्बर २ का वडा अध्यक्ष निरज रौनियारले जानकारी दिनुभयो । यो नेपालकै दोस्रो अग्लो शिवमुर्ति हुने दाबी गरिएको छ ।

नगर प्रमुख यादवले मूर्ति सँगै अन्य संरचना पनि निर्माण गरी झरही खोला किनारलाई करिडोरसंगै पर्यटकीय र धार्मिक केन्द्रको रुपमा विकास गर्ने लक्ष्य रहेको बताउनुभयो ।

उक्त स्थलमा शिवमुर्ति निर्माण भएपछि खुल्ला व्यायामशाला, सन्तसाधुहरु बस्ने घर, १०८ शिवलिंङ्ग, पानीको फोहोरा आदि निर्माण हुने छ । जसको लागत ५ करोड बराबर रहेको छ । पोखरामा निर्माण भएको शिवमुर्ति मात्र ५१ फिटको छ तर तलको संरचना सहित १ सय ८ फिट रहेको बताइएको छ ।धार्मिक पर्यटन प्रवर्द्धनका लागि शिव मूर्ति आकर्षणको केन्द्र बन्न सक्ने नगरप्रमुख यादवले विश्वास व्यक्त गर्नुभयो ।