ट्रक पल्टिँदा दुईको मृत्यु, तीन घाइते 

चितवन  । नारायणगढ–मुग्लिन सडक खण्डअन्तर्गत इच्छाकामना गाउँपालिका वडा नं–६ स्थित नौकिलोमा आइतबार ६ः४५ बजे चामल बोकेको ट्रक अनियन्त्रित भई सडक किनारमा पल्टिँदा  दुई जनाको मृत्यु भएको छ भने तीनजना घाइते भएका छन् । 

नारायणगढबाट मुग्लिनतर्फ जाँदै गरेको बागमती प्रदेश ०३–००१ ख ३४९० नम्बरको ट्रक दुर्घटनामा गम्भीर घाइते भएको मकवानपुरको मकवानपुरगढी गाउँपालिका–६ बस्ने ३८ वर्षीय श्याम बजगाईँ र सोही ठाउँ बस्ने ३१ वर्षीय दीपक दाहालको भरतपुर सरकारी अस्पतालमा मृत्यु भएको जिल्ला प्रहरी कार्यालय चितवनले जनाएको छ । मृतक दुवैको परिवारका आफन्तले शवको सनाखत गरेका छन् ।

 घाइते ट्रकका सह–चालक रामेछाप घर बताउने २१ वर्षीय मानबहादुर विकको एलाइभ अस्पताल भरतपुर, हेटौँडा उपमहानगरपालिका वडा नं–१८ बस्ने ६० वर्षीय दलबहादुर कोइराला र मकवानपुरको मकवानपुरगढी गाउँपालिका–६ बस्ने २७ वर्षीय सुसन विकको नयाँ मेडिकल कलेज (सिएमसी) भरतपुरमा उपचार भइरहेको प्रहरीले जनाएको छ ।

ट्रक चालक मकवानपुरगढी–६ बस्ने २८ वर्षीय दिनेश पुडासैनीलाई सोमबार बिहान ३ः०० बजे इलाका प्रहरी कार्यालय मुग्लिनले नियन्त्रणमा लिएको  छ ।