ट्याक्टर र मोटरसाइकल एकआपसमा ठोक्किँदा एक जनाको मृत्यु, दुई घाइते 

उदयपुर । उदयपुरको त्रियुगा नगरपालिका वडा नं. १३ असारीस्थित दनुवारी चोकमा ट्याक्टर र मोटरसाइकल एक आपसमा ठोक्किँदा एक जनाको मृत्यु भएको छ भने दुई जना घाइते भएका छन् ।

दुर्घटनामा मोटरसाइकल चालक महादेव चौधरीको मृत्यु भएको हो भने सोही मोटरसाईकलमा सवार उनका दुई छोराहरू, दिवाकर चौधरी(१५ वर्ष) र कृष्ण चौधरी(१० वर्ष), घाइते भएका छन् ।

दुर्घटनापछि प्रहरी टोलीले घटनास्थलमा पुगेर घाइतेलाई जिल्ला अस्पताल उदयपुर ल्याएको थियो। जिल्ला अस्पतालले महादेव चौधरीलाई मृत घोषित गरेको थियो । घाइते दुई जनालाई प्रारम्भिक उपचारपछि विराटनगरको न्यूरो अस्पताल रेफर गरिएको प्रहरीले जनाएको छ ।

प्रहरीले ट्याक्टर चालक राजन बोटे र सहचालक अनिल सदालाई नियन्त्रणमा लिएको छ। 

दुर्घटनामा संलग्न ट्याक्टर र मोटरसाइकल प्रहरीको नियन्त्रणमा छ।