मोटरसाइकल दुर्घटनामा एक जनाको मृत्यु, दुई घाइते

वीरगंज । बाराको जीतपुर सिमरा उपमहानगरपालिका वडा नम्बर १० नितनपुरमा आज भएको मोटरसाइकल दुर्घटनामा घाइते भएका एक युवकको मृत्यु भएको छ ।

दुर्घटनामा अन्य दुई जना घाइते भएका छन् । मृत्यु हुनेमा वीरगन्ज महानगरपालिका वडा नम्बर १९ विन्दवासिनी टोल बस्ने जोखु मियाको छोरा २० वर्षीय राज मियाँ रहेको प्रहरीले जनाएको छ । 

घाइते हुनेमा मोटरसाइकल पछाडि सवार पर्साको बहुदरमाई नगरपालिका वडा नम्बर–६ भौराटार बस्ने मोलिरहमान मियाको छोरा १७ वर्षीय महबुब मिया र वीरगन्ज महानगरपालिका वडा नम्बर १९ केहुनिया बस्ने सरोज प्रसाद यादवको छोरा १६ वर्षीय विक्की यादव रहेका छन् ।

महबुबको टाउको र शरीरको विभिन्न भागमा चोट लागेको र अवस्था गम्भीर रहेको जिल्ला प्रहरी कार्यालय बाराका प्रवक्ता प्रहरी नायव उपरीक्षक प्रकाश सापकोटाले जानकारी दिनुभयो । 

यादवको टाउको र शरीरको विभिन्न भागमा चोट लागेको र उनको भने अवस्था मध्यम रहेको प्रहरीले जनाएको छ । घाइते दुवै जनाको वीरगंजको गण्डकस्थित न्यूरो अस्पतालमा उपचार भइरहेको छ ।