बोयर बाख्राबाट राम्रो आम्दानी

म्याग्दी। म्याग्दीको बेनी नगरपालिका–३, भकिम्ली डाँडाखानीमा विगत १२ वर्षदेखि बाख्रा पालन गर्दै आएका धन श्रीसले बोयर जातको बाख्रा पालनबाट राम्रो आम्दानी गर्न सफल हुनुभएको छ । 

श्रीसले पशुपालन तथा बहुउद्देश्यीय कृषि फार्म प्रा.लि. सञ्चालन गरी बोयर जातका शत प्रतिशत शुद्ध पाठापाठी उत्पादन गरेर नेपालभरी बिक्री गर्दै आउनुभएको छ । उहाँले दुई÷तीन वर्ष पहिले बोयरका बोका र पाठीलाई दुई लाख मूल्यमा बिक्री हुँदा वार्षिक ६० लाख रुपैयाँको कारोबार गर्नुहुन्थ्यो  । अहिले भने मूल्य घटेर प्रतिवटा ८० हजार रुपैयाँ आउँदा आम्दानी केही  घटेको बताउनुभयो । श्रीसले आफ्नो फार्ममा करिब दुई करोड लगानी रहेको बताउनुभयो । बोयरको बिक्रीबाट वार्षिक  २०÷२५ लाखको कारोबार गरिरहेको श्रीसले बताउनुभयो  । छिटो–छिटो हुर्कने उन्नत जातको बोयर बाख्रा पालन गर्दै आएका श्रीसको फार्ममा अहिले ३५ वटा बाख्रा छन् । 

अहिले फार्ममा पाठाहरू जन्माउने १५ वटा माउ बाख्रा छन् । अन्य साना पाठापाठी पनि छन् । अहिले नश्ल सुधारका दुईवटा बोका फार्ममा पालिरहेको उहाँले जानकारी दिनुभयो । ‘दूईवर्ष पहिले फार्ममा एकसय जति शुद्ध बोयर थिए । माग पनि राम्रो थियो । आम्दानी मनग्य गर्न सफल भएको थिए’, उहाँले भन्नुभयो । ‘अहिले  देशमा युवाहरूको कमीले गर्दा उन्नतजातको बाख्रापालन माग घट्दै गएको हुँदा बिक्री पहिले जस्तो भएको छैन। अहिले मूल्य घटेको छ ।  छिटो राम्रो आम्दानी गर्नका लागि यो जातको बाख्रापालन राम्रो छ ।’ 

२०६८ सालदेखि बाख्रा पालन गरेका श्रीसले सुरुसुरुमा लोकल जातका बाख्राबाट व्यवसाय सुरु गर्नुभएको थियो । 

लोकल जातका बाख्रापालनबाट राम्रो आम्दानी नभएपछि शुद्ध बोयर बाख्रा खरिद गरेर पाल्न सुरु गरेपछि आफु  जिल्लाको नमुना कृषक रुपमा परिचित हुन पुगेको उहाँले बताउनुभयो । 

उहाँले अहिले फार्मका २० वटा पाठीहरू अरूलाई पालन गर्नसमेत दिएको बताउनुभयो । आफूले बाख्राको लागि चाहिने घाँसका लागि ६० रोपनी जग्गामा घाँस खेती गरेको बताउनुभयो । 

व्यवस्थित रुपमा दुई वटा खोर बनाएर बाख्रा पालन गरेका श्रीसको फार्म हेर्न विभिन्न ठाउँबाट कृषक आउने गर्नुभएको छ । उन्नत जातको बाख्रापालन सुरुवात गरेका श्रीसले गाउँमा अन्यलाई पनि उन्नत जातको बाख्रा पालनमा लाग्न प्रेरित गरिरहनुभएको छ ।