मेलम्ची–हेलम्बु सडक निमार्णको काम अनिश्चित, बाढीको जोखिम कायमै
सिन्धुपाल्चोक । मेलम्ची खोलामा आएको बाढीले निरन्तर कटान गरेपछि मेलम्ची हेलम्बु सडक निमार्णको काम अनिश्चित बनेको छ ।
असार १ गतेपछि आएको बाढीले भत्काएको सडक पटक पटक बनाएर यातायात सञ्चालन गरे पनि निरन्तरको बाढी र कटानले गर्दा सडक पुनः अवरुद्ध भएको छ ।
सडक सञ्जाल नहुँदा मेलम्चीदेखि माथिल्लो भेगका नागरिकहरुले सास्ती भोग्न परेको छ ।
सडक नहुँदा पुल निमार्णको काममा समेत बाधा पुगेको हेलम्बु गाउँपालिकाका अध्यक्ष निमा ग्याल्जेन शेर्पाले बताउनुभयो ।
“लगभग यतिबेला पुल निमार्णको काम सकिनै लाग्थ्यो बाटो नभएर सामान ल्याउनै पाइएन समस्या भयो” अध्यक्ष शेर्पाले भन्नुभयो ।
दसैँ सम्ममा अस्थायी आवास निमार्णको काम सक्ने र प्रभावितलाई स्थानान्तरण गर्ने हेलम्बु सरकारको योजनामा समेत अहिलेको बाढीले प्रभाव पारेको छ ।
निरन्तरको वर्षाका कारण अहिले पनि मेलम्ची खोलामा बाढी आउँदा हेलम्बुदेखि सिपाघाट सम्मका नदी किनारका बस्ती जोखिममा परेका छन् ।
आज मात्रै पनि मेलम्ची नगरपालिका वडा नम्बर ६ तालामाराङ बजार नजिकैको १ घर बाढीले ढलाएको प्रत्यक्षदर्शीले जानकारी दिएका छन् । बाढीले वितण्डा मच्चाएको हेलम्बु मेलम्चीमा अहिले पनि जोखिम कायमै रहेको छ ।
मेलम्ची नगरपालिकाका प्रमुख डम्बर अर्यालले नदी किनारको बस्तीमा बसोबास गर्नेहरूलाई सुरक्षित स्थानमा बस्न आग्रह गरेका छौँ अझै जोखिम कायमै भएकाले सतर्कता अपनाउन भनेका छौँ भन्नुभयो ।
“नदी नियन्त्रण र नदीले अवरुद्ध बनाएको सडक खुलाउन हामीले सम्पुर्ण संयन्त्र परिचालन गरेका छौँ ,करोडौँ रुपैयाँ लगानी भइसक्यो तर पनि हाम्रो लगानी र हाम्रो मिहेनत बालुवामा पानी जस्तै भएको छ”, नगर प्रमुख अर्यालले भन्नुभयो ।
प्रतिक्रिया राख्नुहोस्