भोजपुरमा हालसम्म १ हजार ८ सयभन्दा बढी कोरोना सङ्क्रमित
भोजपुर । भोजपुरमा कोरोना सङ्क्रमितको कुल सङ्ख्या १ हजार ८ सयभन्दा माथि पुगेको छ ।
स्वास्थ्य कार्यालय भोजपुरका सूचना अधिकारी सुरेन्द्र बुढाथोकीका अनुसार शनिवार ८ जना थप भएसँगै जिल्लामा कुल संक्रमित सङ्ख्या १ हजार ८ सय ३० पुगिसकेको हो ।
त्यसैगरी, कोभिड–१९ का बिरामी बढेपछि भोजपुरको टेम्केमैयुङ गाउँपालिका वडा नम्बर १ तिम्माको रिमचिम टोल १५ दिनका लागि बन्द गरिएको छ ।
स्थानीयले सिताराम राईको संयोजकत्वमा सतर्कता समिति गठन गरेर टोलमा आवतजावत बन्द गर्ने निर्णय नै भएको छ ।
वडा सदस्य गणेश राईका अनुसार केही दिनअघि ७४ जनाको कोभिड परीक्षण गर्दा १४ जनाको रिपोर्ट पोजेटिभ आएको थियो ।
सदरमुकाममा चहलपहल बढेसँगै भोजपुरमा हालसम्म सबैभन्दा धेरै भोजपुर नगरपालिकामा ५ सय ५५ जनामा कोरोना संक्रमण देखिएको छ ।
यस्तै टेम्केमैयुङ गाउँपालिकामा २ सय ५६, हतुवागढी, २ सय १२, साल्पासिलिछो १ सय ७९, अरुण १ सय ६३, रामप्रसाद राई १ सय ६२, षडानन्द नगरपालिका १ सय ५५, आमचोक गाउँपालिका ९९ र पौवादुङमा गाउँपालिकामा ४९ जना संक्रमित छन् । जसमा १ हजार ५ सय २१ जना निको भएका छन् ।
जिल्लामा उपचारका क्रममा १० जनाले ज्यान गुमाइसकेका छन् भने २ सय ६२ जना सक्रिय संक्रमित उपचाररत रहेका छन् ।
प्रतिक्रिया राख्नुहोस्