केसीको ह्याट्रिकमा खुमलटार युथ क्लबको सहज जित

काठमाडौं । सविन केसीको ह्याट्रिकमा खुमलटार युथ क्लबले सहिद स्मारक ‘बी’ डिभिजन लिगमा सहज जित निकालेको छ । सोमबार भएको खेलमा खुमलटारले श्री कुमारी क्लबमाथि ३–१ को सहज जित निकालेको हो ।

एन्फा कम्प्लेक्स सातदोबाटोमा भएको खेलको खुमलटारका सविन केसीले ह्याट्रिक पुरा गर्दा श्री कुमारीका मिसन लामाले सान्त्वना गोल गरे । सबै चार गोल पहिलो हाफमा सम्भव भएको थियो । दोस्रो हाफमा दुवै तर्फबाट गोल निस्कन नसक्दा खुमलटार ३–१ ले विजयी हुन सफल भयो ।

जितसँगै खुमलटार दोस्रो स्थानमा उक्लिएको छ । खुमलटारको ५ खेलबाट १३ अंक पुगेको छ । शीर्षस्थानको सातदोबाटो युथ क्लबको समान ५ खेलबाटै १५ अंक छ । पराजित श्री कुमारी ५ खेलबाट ३ अंक जोडेर १० औं स्थानमा छ ।

अर्को खेलमा श्री भगवती युथ क्लब र टुसाल युथ क्लबले बराबरी खेल्दै अंक बाडेका छन् ।

एन्फा कम्प्लेक्स सातदोबाटोमा सोमबार भएको खेलमा श्री भगवती र टुसालले १–१ गोलको बराबरी खेलेको हो । सुरुवाती अग्रता बनाएपनि अन्तिम समयमा चुक्दा श्री भगवतीले बराबरीमा चित्त बुझाएको हो ।

खेलको आठौं मिनेटमा मोहन बहादुर थापा मगरको गोलबाट श्री भगवतीले अग्रता बनाएको थियो । तर, खेलको इन्जुरी समयमा संगम शाहीले गोल गर्दै टुसाललाई हारबाट जोगाएका थिए । बराबरीसंगै टुसालले ५ खेलमा ८ अंक जोडेको छ । श्री भगवतीले ५ खेलमा ५ अंक जोडेको छ ।

आगामी चैत २३ गतेसम्म चल्ने लिगमा लिगमा १२ क्लबले प्रतिस्पर्धा गरिरहेका छन् । एक टिम ‘ए’ डिभिजन लिगमा बढुवा हुनेछ भने एक टिम ‘सी’ डिभिजनमा घटुवा हुनेछ ।